Қайта тикланувчи энергия манбалари ривожланаётганига қарамай, электр энергияси ишлаб чиқаришда асосий юклама ҳамон иссиқлик электр станциялари ҳиссасига тўғри келмоқда. Октябрь ойида улар 5,45 млрд кВт·соат электр энергияси ишлаб чиқарган. Бу мамлакатдаги жами ишлаб чиқаришнинг қарийб 75 фоизини ташкил этади. Кўрсаткич 2025 йил октябрига нисбатан 2,3 фоизга ошган.

Шу билан бирга, қуёш ва гидроэлектр станцияларида электр энергияси ишлаб чиқариш сезиларли даражада кўпайган. Қуёш станциялари 729,9 млн кВт·соат электр энергияси ишлаб чиқарган. Бу бир йил аввалги кўрсаткичдан 39,2 фоизга кўп. ГЭСлар эса 491,7 млн кВт·соат электр энергияси ишлаб чиқариб, натижани 41,8 фоизга оширган.

Шамол энергетикасида эса ишлаб чиқариш бироз камайган. Октябрь ойида шамол электр станциялари 459,6 млн кВт·соат электр энергияси ишлаб чиқарган. Ўтган йилнинг шу ойида бу кўрсаткич 466,8 млн кВт·соатни ташкил этган. Камайиш 1,5 фоизга тенг.

Блокли электр станциялар ҳиссасига яна 89,2 млн кВт·соат тўғри келган. Бу ўтган йилги кўрсаткичдан 12,5 фоизга кўп.

Кичик қуёш панеллари эса 10,7 млн кВт·соат электр энергияси ишлаб чиқарган. Бу 2025 йил октябридаги 5,7 млн кВт·соатлик натижадан деярли икки баробар кўп. Ўсиш 87,7 фоизни ташкил этган.

В. Новиков