Ҳамюртимиз халқаро ташкилот аъзосига айланди

Ўзбекистон замонавий бешкураш федерацияси бош котиби, Ўзбекистон поло федерацияси раиси ўринбосари Ксения Гулямова Халқаро замонавий бешкураш иттифоқи (УИПМ) ижроия қўмитаси қарорига кўра, 2024 йилгача бўлган муддатга қадар УИПМ Хотин-қизлар қўмитаси аъзоси этиб тайинланди.

Олдинроқ ҳамюртимизнинг номзоди УИПМ президенти, доктор Клаус Шорманн томонидан ташкилот Ижроия қўмитаси томонидан кўриб чиқишга тавсия қилинган эди.

Эслатиб ўтамиз, 2021 йил 27-28 ноябрь кунлари ўтказилган УИПМнинг онлайн Конгрессида Ўзбекистон замонавий бешкураш федерацияси томонидан халқаро ташкилот қошида Хотин-қизлар қўмитасини тузиш ғояси илгари сурилган эди.

Бундан кўзланган мақсад — спортчилар, тренерлар, ҳакамлар ва спорт федерациялари раҳбарлари орасида гендер тенглигини таъминлашдан иборат. Таъкидлаш керак, УИПМ қошида Хотин-қизлар қўмитасини тузиш таклифини онлайн Конгресс иштирокчиларининг 95 фоизи қўллаб-қувватлади.

Манба: minsportuz