Бокс. 2022 йилги жаҳон чемпионатларининг ғолиб ва совриндорлари муносиб тақдирланишди

Якунига етиб бораётган йил ўзбек спорти учун улкан муваффақиятларга бой бўлди. Спортчиларимиз Осиё ва жаҳон чемпионатлари, комплекс мусобақаларда юртимиз шарафини муносиб ҳимоя қилиб, Ватанимизга ёруғ юз билан қайтишди. Ўзбекистон Республикаси Президентининг “Жаҳон чемпионатларида юқори натижаларга эришгани учун Ўзбекистон Республикаси спортчиларини мукофотлаш тартибини такомиллаштириш тўғрисида”ги ПФ — 4056 Фармонига асосан ҳар йили Олимпия ва Паралимпия спорт турларида катталар ўртасидаги жаҳон чемпионатларида ғолиб ва совриндор бўлган спортчилар ҳамда уларни тайёрлаган тренерлар бир марталик пул мукофоти билан тақдирланишади. Бугун Миллий Олимпия қўмитасида 2022 йил дунё биринчиликларида шоҳсупага кўтарилган спортчи ва тренерларни тақдирлаш маросими бўлиб ўтди.

Тадбирда Адҳам Икрамов бошчилигидаги Спортни ривожлантириш вазирлиги мутасаддилари, Осиё Олимпия кенгаши вице-президенти Отабек Умаров, Миллий Олимпия қўмитаси Бош котиби Ойбек Касимов, Миллий Паралимпия қўмитаси раиси Мухторхон Ташходжаев, МОҚ раиси ўринбосарлари Равшан Ирматов ва Азизжон Камилов, Спорт фахрийлари кенгаши раиси Баҳодир Махситов, федерация ва ассоциацияларнинг масъуллари, спортчи ва мураббийлар, фахрийлар иштирок этишди.

Тадбир аввалида ўзбек спортининг 2022 йилги ғалабаларига бағишланган видеоролик намойиш этилди. Шундан сўнг Адҳам Икрамов сўз олиб, юртимиз спортининг аҳил оиласини кириб келаётган янги йил билан қутлади. Шунингдек, вазир ортда қолган йил сарҳисоби ҳақида тўхталиб, давлатимизнинг қўллаб-қувватлаши билан йил спортимиз учун омадли ва муваффақиятли ўтгани, келгуси йил ҳам мана шундай ғалабалар бардавом бўлиши тилади.

Шундан сўнг тақдирлаш маросимига навбат берилди. Унга кўра, жаҳон чемпионатларида олтин медални қўлга киритган спортчиларимиз 12 000, кумуш медаль соҳиблари 6 000 ва бронза медали эгалари 3 000, мураббийлар ҳам мос равишда 6 000, 3 000 ва 1500 АҚШ доллари миқдоридаги бир марталик пул мукофотлари билан тақдирланишди.

Шу жумладан Туркияда ўтказилган аёллар ўртасидаги жаҳон чемпионатида бронза медалини қўлга киритган боксчиларимиз Азиза Якубова ва Моҳира Абдуллаева, ҳамда уларнинг мураббийлари Зиятдинбек Тайганбаев билан Саҳида Якубовалар ҳам тақдирланишди.

Ўз навбатида, спортчи ва мураббийларимиз давлатимиз томонидан кўрсатилаётган бундай эътибор ва ғамхўрликдан мамнун эканликларини билдириб, келгусида ҳам билдирилган ишончни оқлашга ваъда беришди.

Шунингдек, тақдирлаш маросими доирасида “Миллий спорт мукофоти — 2022”нинг “Халқаро тадбирларнинг энг яхши ташкилотчиси” номинацияси ғолиби Осиё Олимпия кенгашига аталган соврин тантанали равишда ташкилотнинг мамлакатимиздаги вакили, ООК вице-президенти Отабек Умаровга топширилди.

Кўтаринки руҳда ўтган тадбирни фахрийларимизнинг оқ фотиҳаси якунлаб берди.

Манба: Ўзбекистон бокс федерацияси матбуот хизмати