Tata Steel Chess 2024. Нодирбек Абдусатторов 6-турда чемпион билан дуранг ўйнади

Нидерландиянинг Вейк ан-Зее шаҳрида шахмат бўйича Tata Steel Chess 2024 турнирида бугун 6-тур баҳслари ўтказилмоқда.

Турнирнинг Мастерс гуруҳида иштирок этаётган ўзбекистонлик гроссмейстер Нодирбек Абдусатторов 6-турда хитойлик Динг Лиренга қарши қора доналарда ўйнади. Томонлар нисбатан тезкор ўйин намойиш этишди ва бирин-кетин сипоҳларни алмашишди.

30-юришдан кейин тахтада 4 тадан пиёда ҳамда биттадан руҳ ва от қолгач, дурангга келишишди.

Абдусатторов мазкур дурангдан кейин ўз очколарини 3,5 тага етказди ва жадвалда 2-ўринни эгаллаб турибди.

Ҳамюртимиз 7-турда пешқадам Аниш Гири (Нидерландия)га қарши оқ доналарда ўйнайди.

Манба: stadion.uz