«Фарғона водийси „порох бочкаси“ эмас, балки тинчлик, яхши қўшничилик ва бунёдкорлик маконига айланди» — Шерзод Асадов
«1997 йилда ўз даврининг йирик геостратегларидан бири бўлган Збигнев Бжезинский ўзининг «Буюк шахмат тахтаси» китобида Фарғона водийсини геосиёсий кескинлик ўчоғига айланишини башорат қилган, айрим экспертлар эса ҳатто «порох бочкаси»га ўхшатган эди. Дарҳақиқат, учта мустақил мамлакатга дахлдор бу қадимий ҳудудда яқин-яқингача шундай воқеалар рўй бердики, кўпчилик бу машъум башорат ҳақиқатдан унчалик ҳам йироқ эмаслигига ишонганди», — дея ёзди у ўз Telegram каналида.
«Аммо бугун биз бутунлай бошқача воқеликда яшамоқдамиз. Президент Шавкат Мирзиёевнинг узоқни кўра биладиган раҳбарлиги, тизимли ва чуқур ўйланган ислоҳотлари туфайли Фарғона водийсининг учта вилояти ва унинг юраги бўлмиш Андижон бутунлай ўзгариб кетди», — дейди Асадов.
Унинг қайд этишича, бугунги кунда Андижон иқтисодий ўсиш, тадбиркорлик ташаббуси, инновация руҳи, интеллектуал тараққиёт ва маданий тикланишнинг қудратли марказига айланган. «Бу шундай заминки, ҳар бир янги лойиҳа келажак пойдеворини мустаҳкамлайдиган тамал тошидир. Бу ерда одамлар орзу қиляпти ва ўз мақсадларига эришяпти. Ўқийман, изланаман, даромад топаман ва бошқаларга ҳам даромад манбаи яратаман деганларга — кенг йўл. Янги — Бобур шаҳри қурилмоқда», — дейди у.
«Тан олиш керак, Андижон — илм, интилиш, меҳнатсеварлик ва тўғри йўлга қўйилган давлат сиёсати бутун бир ҳудудни нақадар ўзгартириб юбориши мумкинлигининг ёрқин намунасидир. Аҳолиси зич, ер ресурслари чекланган, яқингача саноати фақат Асака заводидан иборат бўлиб келган вилоят аҳли президентимиз олиб бораётган ислоҳотлар кучидан, яратилган ҳар бир имкониятдан тўлиқ, максимал даражада фойдаланяпти, ҳар жабҳада реал, кундалик ҳаётда сезиш мумкин бўлган натижаларга эришяпти. Бундан қувонсак ва ибрат олсак арзийди, албатта», — дея қўшича қилди президент матбуот котиби.
«Эски башоратларни унутиш вақти келди. Эндиликда, шу жумладан уч давлат раҳбарларининг саъй-ҳаракатлари ва дўстлиги туфайли бугун Фарғона водийси „порох бочкаси“ эмас, балки имкониятлар, фаровонлик, тинчлик, яхши қўшничилик ва бунёдкорлик маконига айланди. Андижон, Фарғона ва Наманганга келсак, улар эртанги кунга ишонч ва кучли, адолатли давлат раҳбарининг эътибори билан халқимиз нималарга қодир эканини исботламоқда», — дея постини якунлаган Шерзод Асадов.
Аввалроқ Фарғона водийси билан чегарадош Ўзбекистон, Тожикистон ва Қирғизистон чегараларининг туташ нуқтаси тўғрисидаги шартнома имзоланганди.
Эслатиб ўтамиз, шу кунларда Шавкат Мирзиёев Андижон вилоятига ташриф билан бўлиб турибди. 15 апрель куни давлат раҳбари қурилаётган Янги Андижон шаҳрини Бобур шаҳри деб аташни таклиф қилди.
16 бўлиб ўтган йиғилишда президент Қирғизистон билан чегарадош ҳудудлардан бирида савдо ва саноат зоналарини ташкил этиш зарурлигини айтди. Андижон марказидаги ҳибсхона ўрнида савдо мажмуаси қурилишини маълум қилди. Шунингдек, Андижонда ҳалқа йўли қурилиши, Қорадарё устидан кўприк реконструкция қилиниши таъкидланди.