Ўзбекистон Марказий Осиёнинг Италия билан хавфсизлик ва иқтисодиёт бўйича ҳамкорлигини кенгайтиришга чақирди

Ўзбекистон президенти Шавкат Мирзиёев 30 май куни Остона шаҳрида бўлиб ўтган «Марказий Осиё — Италия» саммитида нутқ сўзлади, деб хабар қилди давлат раҳбари матбуот хизмати.

Дастлаб у саммитни яқинда Самарқандда бўлиб ўтган саммитда эришилган Марказий Осиё минтақаси ва Европа ўртасида стратегик шериклик тўғрисидаги келишувлар контекстида кўриб чиқаётганини таъкидлади.

«Ўзбекистон томони ушбу форматдаги самарали амалий ҳамкорликни, аввало, мамлакатларимизнинг технологик, саноат ва интеллектуал салоҳиятини ҳисобга олган ҳолда ривожлантиришга қатъий азму қарор қилган», — деди Шавкат Мирзиёев.

Шунингдек, у бугунги сиёсий воқеликда ва хавфсизлик муаммолари ортиб бораётган шароитда Италия билан кўп томонлама мулоқот платформаси талаб катта эканини таъкидлади.

«Сиёсий соҳада ташқи сиёсат идоралари даражасида доимий мулоқотларни давом эттириш тарафдоримиз. Халқаро кун тартибида ўзаро мувофиқлаштириш ва келишилган ёндашувларни талаб этадиган бир қатор долзарб масалалар мавжуд», — деди давлат раҳбари.

«Италия бош вазири, ҳурматли Мелони хонимнинг Украина атрофидаги вазиятни тинч йўл билан ҳал этиш учун тўғридан-тўғри музокараларни тезроқ бошлаш бўйича фаол дипломатик саъй-ҳаракатларини олқишлаймиз», — деди Шавкат Мирзиёев.

У, шунингдек, Италия томонининг Яқин Шарқ муаммолари ва Афғонистон билан ҳамкорлик истиқболларига бўлган қарашлари учун миннатдорлик билдирди.

«Кеча Самарқандда биз бу нозик масалаларни батафсил муҳокама қилдик ва ёндашувларимиз ўхшаш эканини қайд этдик», — дея қўшимча қилди Ўзбекистон президенти.

Шавкат Мирзиёев терроризм, экстремизм, радикализм, наркотик моддаларнинг ноқонуний айланиши ва ноқонуний миграцияга қарши курашда Марказий Осиё давлатлари ва Италия махсус хизматлари ўртасида кўп томонлама шериклик ва ахборот алмашишнинг ишчи механизмларини ишга туширишни таклиф қилди.

Ўзбекистон президенти иқтисодий соҳада мамлакатлар Савдо-саноат палаталари шафелигида доимий фаолият кўрсатувчи ишбилармонлар мулоқоти платформаси — «Марказий Осиё — Италия» ишбилармонлар клубини ишга туширишни таклиф қилди.

«Тадбиркорларнинг кенг иштирокидаги бундай учрашувлар ҳар йили мамлакатларимиз пойтахтларида ўтказилиши ҳамда савдо ва инвестиция соҳасидаги ҳамкорлик учун янги имкониятлар очиши мумкин», — деди у.

Шавкат Мирзиёев, шунингдек, кенг қамровли кўп томонлама саноат ва технологик ҳамкорлик дастурини ишлаб чиқиш ва қабул қилишни таклиф қилди.

«Гап технологиялар трансфери, илғор билимлар ва энг яхши амалиётларни жорий этиш, юқори технологик саноат корхоналарини яратиш учун қулай шароитларни шакллантириш ҳақида бормоқда», — дея тушунтирди у.

Ўзбекистон раҳбарининг сўзларига кўра, минерал ресурслар ва қишлоқ хўжалиги хомашёсини чуқур қайта ишлаш, электротехника, кимё, тўқимачилик, чарм, озиқ-овқат ва бошқа қайта ишлаш саноати учун замонавий ускуналар ишлаб чиқариш, бутловчи қисмлар ва саноат товарларини маҳаллийлаштириш, Италиянинг етакчи брендлари билан дизайн марказларини яратиш ҳамкорликнинг устувор йўналишлари бўлиши мумкин.

Президент Тошкент вилоятида Европа оператори бошқарувида махсус саноат парки ташкил этилганини яна бир бор эслатиб, ҳамкорлик лойиҳаларини қўллаб-қувватлашга Италиянинг SACE ва SIMEST давлат идоралари, қўшма инвестиция фондларини жалб этиш таклифини қайтарди.

«Биз Италия ҳукумати билан „яшил“ трансформация соҳасидаги самарали ҳамкорликни юксак қадрлаймиз. Зарарли газлар чиқаришни қисқартириш бўйича миллий дастурлар ижросига кўмаклашишга қаратилган кўптомонлама платформаларни ишга тушириш орқали кенг кўламли шерикликни ривожлантиришга умид қиламиз», — деди Шавкат Мирзиёев.

У Ўзбекистон қайта тикланадиган энергетика соҳасида, жумладан, Европа Иттифоқи мамлакатларига «яшил» энергия етказиб бериш, корхоналарнинг энергия самарадорлигини текшириш ва ошириш, сув инфратузилмаси объектларини модернизация қилиш, водород технологияларини ривожлантириш, жумладан, Италиянинг етакчи ишлаб чиқарувчилари ва инжиниринг компанияларини жалб қилган ҳолда лойиҳаларни амалга оширишга тайёрлигини билдирди.

Ўзбекистон президенти гуманитар соҳада Тошкентдаги Турин политехника ва Пиза университетлари филиалларининг самарали фаолиятини таъкидлади. Шунингдек, у Италиянинг бошқа етакчи университетлари томонидан минтақага қизиқиш ортиб бораётганини маъқуллади.

Ўзбекистон раҳбари муҳандислик, лойиҳалаш, сувни тежаш ва биотехнология каби соҳаларда илмий тадқиқотлар, академик алмашинув дастурлари ва кадрлар тайёрлашни амалга ошириш ва молиялаштириш учун «Марказий Осиё — Италия» илмий-таълим консорциумини ташкил этиш ташаббусини илгари сурди.

Президент, шунингдек, етакчи операторлар ўртасида шериклик алоқаларини ўрнатиш ва қўшма сайёҳлик маҳсулотларини яратиш мақсадида туризм алянси ташкил этишдан манфаатдор эканини таъкидлади.

Шавкат Мирзиёев келгуси йили Хивада минтақа давлатлари ва Италия ўртасида ижодий иқтисодиёт ва маданий алмашинувга бағишланган ёшлар форумини ўтказишни ҳам таклиф қилди.