Тошкентни барқарор энергия билан таъминлаш учун электр тармоқлари модернизация қилинади

Президент Шавкат Мирзиёев 8 август куни Тошкент энергетика тизими барқарорлигини ошириш чора-тадбирлари тақдимоти билан танишди.

Ўтган йилнинг ўзида пойтахтда 12 мингта янги объект, жумладан, савдо ва хизмат кўрсатиш мажмуалари фойдаланишга топширилди. Бу турмуш даражаси ва маиший техникадан фойдаланишнинг ўсиши билан бирга, электр энергияси истеъмолини ҳам оширади.

Икки йил давомида шаҳар электр таъминотини модернизация қилиш учун 2,8 триллион сўм (Марказий банкнинг амалдаги курси бўйича 222,5 миллион доллар) йўналтирилган: 36 та нимстанция, 665 та трансформатор, 2 минг километрдан ортиқ тармоқ янгиланган. Шунга қарамай, 46 та нимстанция ва 207 та трансформатор ортиқча юклама билан ишламоқда. Йил бошидан буён истеъмолчилар сони 40 мингга, талаб 6 фоизга ошган.

Бундан ташқари, агар илгари ёзда жазирама давомийлиги бир ҳафтадан ошмаган бўлса, бу йил у 20 кун давом этди, дейилади хабарда. Июль ойида шаҳарда электр энергияси истеъмоли даражаси 900 миллион кВт/соатдан ошган.

Тошкентдаги тақсимлаш тармоқларининг ҳозирги ҳолати ва режалар

Тақдимотда энергетика вазири Жўрабек Мирзамаҳмудов пойтахтнинг ҳар бир тумани ва маҳалласи бўйича режалар билан таништирди.

• Вазир тақдимотига кўра, бугунги кунда Тошкент шаҳрида 0,4−110 кВ кучланишли тақсимловчи электр тармоқларининг узунлиги 9747 км ни ташкил қилади;
• эскирган тармоқлар — тахминан 5000 км (51%);
• эскирган электр тармоқлари — 73 та (39%);
• эскирган трансформатор станциялари — тахминан 1400 (21%);
• абонентлар сони — 840 минг;
• 32 та махсус техника ва 39 та автомашина, 410 ишчидан иборат 78 та бригада.

Биринчи босқичда йил охиригача 374 километр тармоқ, 11 нимстанция ва 62 трансформаторни янгилаш режалаштирилган. 2026 йилда модернизация яна 788 км тармоқ, 35 та нимстанция ва 145 та трансформаторни қамраб олади. Хусусан, маҳаллалардаги трансформатор ва тармоқлар таъмирланиб, янгилари ўрнатилади.

Президент куз-қиш мавсуми яқинлашиб келаётганига эътибор қаратиб, жорий режа бўйича барча ишларни 1 ноябргача якунлаш зарурлигини таъкидлади.

Шу билан бирга, мамлакатда ишлаб чиқариш қуввати оширилиб, корхоналар муқобил энергияга айлантирилмоқда. 2027 йилга бориб йирик корхоналар ва сайёҳлик объектлари томонидан қуввати 752 МВт бўлган қуёш электр станциялари ва 812 МВт қувватга эга омборхоналар ўрнатиш режалаштирилмоқда.

2023 йил ноябрь ойида энергетика вазири Жўрабек Мирзамаҳмудов энергетика инқирози шароитида Қонунчилик палатасидаги «Ҳукумат соати»да депутатлар саволларига жавоб берганди. Ўшанда у Тошкент шаҳрининг энергетика инфратузилмасини янгилаш, жумладан, электр тармоқлари ва нимстанцияларни қуриш ва таъмирлаш учун 14 триллион сўм (тахминан 1,14 миллиард доллар) йўналтирилганини маълум қилган.

1 август куни сенатор Сайёра Абдикаримова Энергетика вазирига мурожаат қилиб, Тошкент шаҳрида аҳолининг шикоятларига сабаб бўлаётган электр таъминотидаги узилишлар, хўжалик юритувчи субъектлар фаолиятидаги носозликлар, йўл ҳаракати хавфсизлигини таъминлаш сабабларини тушунтиришни сўраган эди.