Ўзбекистон Озарбайжон ва Арманистон ўртасидаги тинчлик сулҳини олқишлайди — ТИВ
«Куни кеча Вашингтонда тарихий Қўшма декларациянинг имзоланишига Озарбайжон ва Арманистон етакчиларининг кучли сиёсий иродаси ва қатъияти, шунингдек, Америка Қўшма Штатлари президентининг фаол тинчликпарвар саъй-ҳаракатлари туфайли эришилди, деб ҳисоблаймиз», — дейилади вазирлик баёнотида.
ТИВ барча томонларнинг кўп йиллик можарони бартараф этишга қаратилган саъй-ҳаракатларини юқори баҳолашини таъкидлаган.
«Ишончимиз комилки, Жанубий Кавказда узоқ муддатли тинчлик ва барқарорликнинг имкон қадар тезроқ ўрнатилиши кенг минтақамиздаги барча халқлар манфаати учун йирик транспорт ва инфратузилмавий лойиҳаларни амалга оширишга замин яратади», — дея қайд этган вазирлик.
8 август куни Озарбайжон президенти Илҳом Алиев ва Арманистон бош вазири Никол Пашинян АҚШ воситачилигида мамлакатларнинг ҳарбий қарама-қаршилигидан воз кечиш тўғрисидаги декларацияни имзолади.
«35 йилдан ортиқ вақт давомида Арманистон ва Озарбайжон улкан азоб-уқубатларга олиб келган можарога қарши курашди… кўпчилик ечим топишга ҳаракат қилди… ва улар муваффақиятсизликка учради. Мана шу битим билан ниҳоят сулҳ тузишга муваффақ бўлдик», — деди АҚШ президенти.
Арманистон ва Озарбайжон 1980 йилларнинг охиридан бери, ўша пайтда Озарбайжоннинг асосан арманлар яшайдиган минтақаси бўлган Тоғли Қорабоғ Ереваннинг қўллаб-қувватлаши билан Бокудан ажралиб чиққанидан бери бир қатор урушлар олиб борди.
2023 йил сентябрь ойида Озарбайжон Тоғли Қорабоғни қайтариб олди, бу ҳудуднинг де-факто ўттиз йиллик мустақиллигига чек қўйди ва унинг деярли 100 минг этник арманининг барчасини Арманистонга кетишга ундади.
Ўшандан бери иккала томон ҳам можарони расман тугатиш учун шартнома имзоламоқчи эканликларини айтишган бўлса-да, музокаралар суст кечаётганди ва ривожланиш секинлашганди.
Мамлакатлар расмий дипломатик алоқаларга эга эмас эди ва уларнинг 1000 км умумий чегараси ёпиқ ва кучли ҳарбийлаштирилган ҳолатда бўлиб қолаётган эди.