«Ўзбек халқи айтиши ва қилишига ишонтирдик». Мирзиёев Трамп билан учрашуви ҳақида

Президент Шавкат Мирзиёев 24 сентябрь куни Американинг етакчи университетларида таҳсил олаётган ўзбекистонликлар ва «Эл-юрт умиди» жамғармаси стипендияси совриндорлари билан учрашувда АҚШ президенти Дональд Трамп билан учрашуви якунларига изоҳ берди.

«Хабарингиз бор, 5 сентябр куни Америка таклифига биноан Трамп жаноблари билан жуда мазмунли суҳбатимиз бўлган эди. У суҳбатда биз, албатта, учрашишимизни айтди. Мен Ўзбекистон тўғрисида билар эдим-у, лекин бунчалигини билмасдим, деди», — дея қайд этди давлат раҳбари («Ўзбекистон 24» телеканали хабарига кўра).

Президент бир кун аввал «жуда яхши учрашув» бўлиб ўтгани, унда кўплаб масалалар бўйича келишувларга эришилганини айтди.

«Twitter`да ёзилганларини ўқигансизлар, албатта. Ўзбек халқи айтади ва қилади, биз шунга ишонтирдик», — деди у.

Мирзиёев музокаралар мамлакат учун янги истиқболларни очиб беришини алоҳида таъкидлади.

«Бир нарсани билинглар, кечаги тарихий учрашувларимиз эртага сизларга кўп нарсага йўл очади. Дунёда энг катта иқтисодиёт бўлган Америкада биз билан учрашган компанияларни ўзларинг кўрдинглар. Трампнинг олдидаги раҳбарлари айтди, агар бизга Трамп топшириқ бермаганида бундай компания раҳбарини йиға олармидик, йўқми, деган гапни ҳам айтди», — деди у.

Президент хорижий ҳамкорларнинг қизиқиши Ўзбекистон салоҳияти билан боғлиқлигини қайд этди.

«Улар нима учун бизга интиляпти? Бизнинг имкониятларимиз жуда катта. Ҳамкорларимиз билан рақобатбардош, қўшимча қийматли маҳсулотларни ишлаб чиқсак, албатта, бозор топамиз», — деди у.

Эслатиб ўтамиз, Ўзбекистон президенти 23 сентябрь куни Нью Йоркда АҚШ президенти билан учрашган эди. Дональд Трамп унга Америка маҳсулотларини, жумладан, 22 дона Boeing 787−9 Dreamliner самолётларини харид қилгани учун миннатдорчилик билдирди. Шавкат Мирзиёев АҚШ раҳбарининг қатор глобал можароларни ҳал этишда эришган ютуқларини қайд этиб, уни Ўзбекистонга таклиф қилди.

Ўзбекистон президенти АҚШ ишбилармонлари билан учрашувда уларга мамлакат салоҳияти ҳақида маълумот берди. Президент Инвестиция вазирлигида АҚШ бўйича ўринбосарлар тайинланганини айтди. «Америка компанияларининг Ўзбекистондаги фаолияти муваффақиятли бўлишига шахсан ўзим кафил бўламан», — деди Мирзиёев.

Давра суҳбати якунлари бўйича АҚШ компаниялари билан ҳамкорликка оид камида 10 та битимни имзоланди. Шавкат Мирзиёев ва АҚШ президентининг махсус вакили Сержио Гор учрашувида турли соҳаларда 100 млрд доллардан зиёд шартнома ва лойиҳалар портфели шакллантирилгани айтилди.