«Россия ва Украина ўртасидаги урушни фақат сиз тўхтата оласиз». Шавкат Мирзиёев — Дональд Трампга

Ўзбекистон президенти Шавкат Мирзиёев 6 ноябрь куни Вашингтондаги Оқ уйда бўлиб ўтган Марказий Осиё давлатлари ва АҚШ етакчиларининг «C5+1» форматидаги саммитида сўзлаган нутқида (видео) АҚШ президенти Дональд Трампнинг Марказий Осиё билан ҳамкорликни ривожлантиришдаги ролини юқори баҳолади. Шунингдек, у Дональд Трамп Россиянинг Украинага қарши урушини тўхтата олишига умид билдирди.

«Биз „С5+1“ форматини қайта ишга туширишга қўшган шахсий ҳиссангизни юксак қадрлаймиз. Бунгача Америка Қўшма Штатларининг ҳеч бир президенти Марказий Осиёга сиз каби муносабатда бўлмаган. Шахсан мен ва барча ҳамкасбларим сиздан миннатдормиз. Биз сизнинг эътиборингизни, муносабатингизни ҳис қилмоқдамиз ва бу биз учун жуда муҳим. Бунинг учун сизга катта раҳмат», — деди Шавкат Мирзиёев.

Унинг таъкидлашича, Ўзбекистонда Дональд Трампнинг халқаро барқарорликни таъминлашга қўшган ҳиссаси эътироф этилган.

«Мен сизга аввал ҳам айтганман: Ўзбекистонда сизни тинчлик президенти деб аташади. Сиз жуда кўп иш қилдингиз — саккизта урушни тўхтата олдингиз. Ва ишончим комилки, Россия ва Украина ўртасидаги урушни фақат сиз тўхтата оласиз. Биз бундан жуда умидвормиз», — деди Мирзиёев.

Давлат раҳбари таъкидлашича, бу галги саммит АҚШ Марказий Осиёни ўзининг асосий шериги сифатида кўраётганини кўрсатади. «Биргаликда ишонч ва бунёдкорликка асосланган келажакни барпо этамиз», — деди у.

Шавкат Мирзиёев «С5+1» формати доирасидаги ҳамкорликни мустаҳкамлаш бўйича қатор ташаббусларни илгари сурди.

«Марказий Осиё мамлакатларида ротация асосида жойлаштириладиган доимий фаолият юритувчи Котибият ташкил этишни таклиф қиламан. Иккинчидан, Инвестициялар ва савдо бўйича мувофиқлаштирувчи кенгаш тузиш ҳамда давлат тузилмалари ва бизнес ўртасида тизимли мулоқотни таъминлаш. Биз Марказий Осиё инвеститсиявий шериклигини ташкил этиш ғоясини қўллаб-қувватлаймиз — бу борадаги келишувга 2020 йилдаёқ эришилган эди», — деди президент.

Шавкат Мирзиёев АҚШ билан транспорт, энергетика ва алоқа соҳаларида қўшма лойиҳаларнинг муҳимлигини таъкидлади.

«Биз «Трамп йўналиши»дан фойдаланиб, Марказий Осиёни Европа билан боғлайдиган транспорт, алоқа ва энергетика лойиҳаларини амалга оширишда АҚШ билан изчил ҳамкорлик қилишга тайёрмиз», — деди давлат раҳбари.

У Ўзбекистон ва АҚШ ўртасида 34 миллиард долларлик инвестиция дастурини амалга ошириш бўйича уч йиллик режа ишлаб чиқилганини маълум қилди. «Булар йирик лойиҳалар бўлиб, биз уларни сиз билан ҳам Нью Йоркда, ҳам бугун муҳокама қилдик.» Gazeta ёзганидек, Дональд Трамп бу дастурни «ақл бовар қилмайдиган савдо-иқтисодий келишув» деб атаган.

«Ушбу саммит муҳим воқеа бўлиб, сизнинг барчамизга бўлган муносабатингиз Марказий Осиё ва минтақамиз ҳамда АҚШ ўртасидаги шерикликни мустаҳкамлашнинг катта қўллаб-қувватланаётганини кўрсатади. „С5+1“ формати амалий ҳамкорликнинг самарали механизмига айланиши керак», — деди Шавкат Мирзиёев.

У навбатдаги саммитни 2026 йилда Самарқандда ўтказишни таклиф қилди.

«Ишончим комилки, жаноб Трамп, сизнинг раҳбарлигингизда бу ҳамкорлик мустаҳкам бўлади,» — дея хулоса қилди Ўзбекистон президенти.