Дадажон Исақулов «Ўзэнергоинспекция» бошлиғи этиб тайинланди

Президентнинг тегишли қарорига кўра Дадажон Айнақулович Исақулов Вазирлар Маҳкамаси ҳузуридаги Электр энергияси, нефть маҳсулотлари ва газдан фойдаланишни назорат қилиш инспекцияси («Ўзэнергоинспекция») бошлиғи этиб тайинланди. Бу ҳақда Энергетика вазирлиги хабар берди.

Дадажон Исақулов бунга қадар 2019 йил апрелидан буён «Ўзбекистон миллий электр тармоқлари» бошқаруви раиси лавозимида ишлаб келаётган эди.

У 1961 йил 20 июлда Тошкент вилоятининг Бўка туманида туғилган. Меҳнат фаолиятини Тошкент вилоятининг Бўка туманидаги машина трактор парки чилангарлигидан бошлаган. 1985 йилда Тошкент политехника институтини тамомлаган сўнг меҳнат фаолиятини ушбу ташкилотда муҳандис сифатида давом эттирган.

Энергетика соҳасида 1986 йилдан бери меҳнат фаолияти юритаётган Дадажон Айнақулович электр монтёрликдан «Ўзбекэнерго» АЖ бошқарув раисининг биринчи ўринбосаригача бўлган йўлни босиб ўтди.

Жумладан, Тошкент вилояти Бўка тумани электр тармоқлари корхонаси бошлиғи, «Ўзэлектртармоқ» унитар корхонаси «Тошкент магистрал электр тармоқлари» директори, сўнгра «Марказий магистрал электр тармоқлари» директори, «Ўзэлектртармоқ» УК бош муҳандиси, «Ўзбекэнерго» АЖ бошқарув раисининг биринчи ўринбосари, «Ўзбекэнерго» АЖнинг «Тошкент ҳудудий электр тармоқлари корхонаси» бош директори, «Ўздавэнергоназорат» инспекцияси бошлиғи, «Ўзэнергоинспекция» бошлиғи лавозимларида ишлаган.