Президент: Фуқароларни эшитиш давлат идоралари фаолиятида бош мезон бўлиши шарт

Халқ билан мулоқот қилиш, фуқароларни тинглаш, уларнинг фикрини инобатга олган ҳолда қарор қабул қилиш маданиятини ошириш давлат органлари фаолиятининг бош мезони бўлиши керак. Бу ҳақда Ўзбекистон президенти Шавкат Мирзиёев чоршанба куни ҳукуматнинг жамоатчилик билан мулоқоти самарадорлигига бағишланган йиғилишда айтиб ўтди.

Давлат раҳбари мамлакатдаги ўзгаришлар фуқаролар мурожаатлари билан ишлаш тизимини такомиллаштириш, Халқ қабулхоналари имкониятларини кенгайтириш ва улар фаолиятига замонавий ёндашувларни жорий этиш, қарорлар қабул қилишда жамоатчилик фикрини чуқур ўрганиш билан бирга олиб борилиши зарурлигини таъкидлади.

Президент аҳолининг кайфияти, эҳтиёжи ва орзу-интилишларини аниқ ва тўлиқ ўрганишда замонавий, профессионал социология ва таҳлилий усуллардан фойдаланиш зарурлигини таъкидлади. Бу ислоҳотлар нақадар самарали бўлаётгани ҳақида холис ахборот олиш ва келгуси истиқболга мўлжалланган тараққиёт дастурларини тўғри ишлаб чиқишнинг муҳим омили, деди у.

Шавкат Мирзиёев мурожаатларга нафақат тезкор жавоб бериш, балки уларни тизимли таҳлил қилиш, социологик тадқиқотлар натижалари билан солиштириш, зарур ечимларни ишлаб чиқиш давлат ва бошқарув органларининг асосий вазифаларидан бири эканини яна бир бор таъкидлади. Умуман олганда, бу мулоқот сифатини ошириш ва давлат ва жамият ўртасидаги ишончни мустаҳкамлашни назарда тутади.

Июнь ойида президент Халқ қабулхоналари ишини танқид қилиб, улар сўровларни давлат идораларига йўналтирувчи «диспетчер»га айланиб қолганини айтганди. Ўтган йили келиб тушган мурожаатларнинг ярмидан кўпи ҳал этилмаган. Ўшанда у барча қабулхоналар ходимлари «масалани ҳал қила оладиган фидойи кадрлар» билан алмаштирилишини, идораларни бошқариш вилоят ва туманлар ҳокимларига топширилишини маълум қилган эди.