Нодирбек Абдусатторов: «Мен «Манчестер Сити» мухлисиман, чунки ушбу клубда ҳамюртим тўп тепади»

Ўзбекистоннинг биринчи рақамли гроссмейстери Нодирбек Абдусатторов қайси футбол клубига мухлислик қилиши ҳақида гапирди. Шахматчи London Chess Classic–2025 турнири доирасида берган интервьюсида футболни мунтазам томоша қилишини таъкидлаб, Англиянинг “Манчестер Сити” клубини энг севимли жамоаси сифатида тилга олди.

— Биз ҳозир “Арсенал” стадионидамиз. Футболга қизиқасизми? Бундай жойда ўйнаш қандай таассурот қолдирди?

— Бу ернинг муҳити ўзгача. Аввал фақат бир марта футбол стадионида, аниқроғи Эйндҳовенда Магнусга қарши ўйнаганман. Ўша баҳс ҳам яхши таассурот қолдирган. Умуман олганда, футболни жуда яхши кўраман, ҳар ҳафта учрашувларни томоша қилиб бораман. Севимли клубим — “Манчестер Сити”.

— Бунга ҳамюртингиз ўша жамоада ўйнаётгани сабабми?

— Ҳа, қисман шундай. Ўз юртимдан чиққан футболчининг бундай катта клубда тўп тепаётгани мени жуда қувонтиради. Шу сабаб “Сити”га мухлислик қиламан.

Маълумот учун, Нодирбек Абдусатторов Буюк Британиянинг Лондон шаҳрида бўлиб ўтган London Chess Classic — 2025 турнирида ғалаба қозонди. Абдусатторов FIDE Жаҳон кубогидаги муваффақиятсиз иштирокидан сўнг 18,4 рейтинг очколарини йўқотган бўлса, London Chess Classic турниридаги ғалабадан сўнг рейтинггини 18,7 очкога яхшилади ва онлайн жадвалида 17-ўриндан 12-ўринга кўтарилиб олди.

Манба: daryo.uz