Озиқ-овқат хавфсизлиги ва иқлим ўзгариши ташаббусларини қўллаб-қувватлаш мақсадида ОПЕК жамғармаси “Asakabank” АЖга 35 миллион АҚШ доллари миқдорида қарз ажратган
Ажратилган ресурслар қишлоқ хўжалиги соҳасида молиялаштириш имкониятларини ошириш, шунингдек банкнинг “яшил молия” портфелини мустаҳкамлашга хизмат қилади. ОПЕК жамғармаси раҳбариятига кўра, ушбу ҳамкорлик Ўзбекистон учун устувор ҳисобланган икки йўналиш: озиқ-овқат хавфсизлиги ва иқлим ўзгаришига қарши чоралар кўриш масалаларини қўллаб-қувватлашга қаратилган.
Қишлоқ хўжалиги Ўзбекистон иқтисодиётининг муҳим тармоқларидан бири бўлиб, ялпи ички маҳсулотнинг тахминан 25 фоизини ташкил этади ҳамда аҳолининг қарийб тўртдан бир қисми ушбу соҳада банд. Шу билан бирга, тармоқ экстремал об-ҳаво ҳолатлари, сув ресурслари танқислиги ва молиявий ресурсларга етарли даражада кириш имкониятининг чеклангани каби муаммоларга дуч келмоқда. Шу боис кичик фермер хўжаликларини қўллаб-қувватлаш кенг қамровли ижтимоий-иқтисодий самара бериши кутилмоқда.
Маълумотларга кўра, “Asakabank” АЖга ажратилган кредит маблағларини кичик ва ўрта бизнес субъектлари ҳамда агробизнес вакилларига қайта молиялаштириш орқали йўналтирилади. Бу фермерлар ва қишлоқ ҳужалигида банд тадбиркорларга замонавий технологияларни жорий этиш, ишлаб чиқаришни кенгайтириш ва бозорларга чиқиш имкониятларини оширишга хизмат қилади. ОПЕК жамғармаси билан ҳамкорлик халқаро молия институтлари иштирокида амалга оширилаётган рискларни тақсимлаш дастури доирасида йўлга қўйилган.
ОПЕК жамғармаси Ўзбекистон билан 25 йилдан буён ҳамкорлик қилиб келмоқда. Шу давр мобайнида давлат ва хусусий сектордаги қарийб 30 та лойиҳага жами 800 миллион АҚШ доллари миқдорида маблағ йўналтирилган. 2024 йилда имзоланган мамлакат бўйича ҳамкорлик дастурига мувофиқ, 2029 йилгача Ўзбекистоннинг барқарор ривожланиш мақсадларини қўллаб-қувватлаш учун қўшимча 500 миллион долларлик молиялаштириш режалаштирилган.