Ўзбекистон АҚШда учта янги консуллик очади ва авиақатновларни кенгайтиради — элчи
Унинг сўзларига кўра, 2026 йилдан бошлаб АҚШ фуқаролари учун визасиз режим жорий этилади, бу эса туризм соҳаси учун янги истиқболларни очади.
У Ўзбекистон ва АҚШ ўртасидаги муносабатлар биринчи марта энг юқори даражага кўтарилганини ва мамлакатнинг АҚШдаги дипломатик ваколатхонаси кенгайтирилишини таъкидлади.
«Президент қарорларига кўра, сўнгги 30 йил давомида Вашингтонда элчихонамиз ва Нью Йоркда бош консуллигимиз фаолият юритиб келди. Президент фармонига мувофиқ, Чикаго, Сан Франциско ва Вашингтон штатларида яна учта қўшимча консуллик очамиз», — деди дипломатик миссия раҳбари.
Элчи бу мамлакатнинг сайёҳлик салоҳиятини тар0иб қилиш учун қўшимча имкониятлар яратишини таъкидлади. Шунингдек, у ЎЗбекистон ҳозирда минтақада АҚШни Марказий Осиё ва Европа билан бевосита боғлайдиган ягона мамлакат эканини таъкидлади.
«Ўзбекистондан ҳафтасига беш марта парвозлар амалга оширилмоқда, бу ҳам ўзига хос кўприк вазифасини бажармоқда ва бундан фаол фойдаланиш керак», — қайд этди у.
Фурқат Сидиқовнинг хабар беришича, ҳаво қатнови географиясини кенгайтириш ҳам кўриб чиқилмоқда:
«Биз Флорида ёки Калифорнияга қўшимча рейслар очиш имкониятини кўриб чиқмоқдамиз. Бу потенциал янада кўпроқ кенгаяди дегани».
Шу муносабат билан у туроператорларни америкалик сайёҳларга мўлжалланган маҳсулотларни ишлаб чиқишга чақирди.
«Мен ҳурматли туроператорларни Америка бозорига мослаштирилган саёҳат пакетларини ишлаб чиқишга таклиф қилмоқчиман. Биласизми, АҚШ бозори жуда талабчан ва стандарт, содда таклифлар бу ерда ишламайди».
У сайёҳлар оқимининг ўсиши бўйича статистикани келтирди: «Янги виза режими жорий этилгандан сўнг, ўтган йили Ўзбекистонга тахминан 40 минг киши ташриф буюрди, 2024 йилда бу кўрсаткич тахминан 25 минг киши эди. Динамика аниқ кўриниб турибди ва тўғри ёндашув билан бу кўрсаткични сезиларли даражада ошириш мумкин».
Фурқат Сидиқов, шунингдек, АҚШда яшовчи ўзбекистонликларга қаратилган «ватандошлар учун пакетлар» ишлаб чиқишни таклиф қилди.
«Ҳозирда АҚШда ўзбекистонлик муҳожирларнинг учинчи авлоди улғаймоқда ва кўпчилик ўз тили ва ватани билан алоқасини йўқотмоқда. Агар биз ватандошларимиз учун махсус турларни таклиф қилсак, ишончим комилки, ўзбек оилалари фарзандларини Ўзбекистон билан таништириш — уларга Самарқанд, Бухоро ва бошқа тарихий жойларни кўрсатиш учун олиб келишдан мамнун бўлади».
Бундан ташқари, у таълим ва спорт туризми истиқболларини таъкидлади.
«Мамлакатимизда таълим туризми ривожланмаган. Бу формат АҚШда яхши ишлайди. Биз аллақачон Канададан талабаларни олиб келганмиз, ўтган йилларда бу катта қизиқиш уйғотган эди. Менимча, таълим туризми, шунингдек, спорт туризми катта салоҳиятга эга».
Элчи, шунингдек, тақдимот материаллари ва туристик таклифлар сифатига эътибор қаратди.
«Ўтган йили АҚШда туроператорларни жалб қилган ҳолда 40 дан ортиқ сайёҳлик тадбирларини ўтказдик. Афсуски, туристик пакетлар тўлиқ ишлаб чиқилмаган, тақдимотлар эса шаблон характерига эга. Бу борада биргаликда ишлашга тайёрмиз. Элчихона катта тажрибага эга ва биз бу соҳада кўп нарса қила оламиз».
Молиялаштириш ҳақида гапирар экан, у рекламага эътибор қаратишни таклиф қилди.
«Мен ушбу маблағларнинг катта қисмини туризмни ривожлантириш ва оммалаштиришга йўналтиришни таклиф қиламан. Масалан, машҳур блогерларни таклиф қилиш».
Охирида Фурқат Сидиқов халқаро медиа платформалари билан ҳамкорлик ҳақида гапирди: «Биз ҳозирда National Geographic канали билан ишлаяпмиз ва бу йил канал жамоаси Ўзбекистонга мамлакат ҳақида ҳужжатли сериал суратга олиш учун келади».
12 ноябрь куни чиқарилган президент фармонига кўра, Ўзбекистон АҚШда ватандошлар диаспоралари тўпланган ҳудудларда (Филаделфия, Чикаго, Орландо ва Сиэтл) янги консулхоналар очишни режалаштирмоқда. Ушбу консулхоналарнинг вазифаси ватандошлар билан алоқаларни йўлга қўйишдан ташқари, икки мамлакат ўртасидаги ҳамкорликни кенгайтиришга кўмаклашиш бўлади.
Ноябрь ойида транспорт вазири ўринбосари Жасурбек Чориев Ўзбекистон АҚШ билан фуқаролари ва бизнес учун виза тартибини соддалаштириш масаласини муҳокама қилишини маълум қилганди. Шунингдек, у янги Boeing самолётларини сотиб олиш орқали мамлакатнинг парвозлар тармоғини кенгайтириш, жумладан, Американинг бошқа шаҳарларига парвозларни амалга ошириш режаларини эълон қилган.