Тошкентда «Наврўз» бозори ва «Буз бозар» филиали реконструкция қилинади

Тошкент шаҳридаги «Наврўз» бозори (аввал «Янги ТТЗ» номи билан танилган) ҳамда унинг «Буз бозар» филиалини реконструкция қилиш режалаштирилмоқда. Бу ҳақда Мирзо-Улуғбек тумани ҳокимлиги матбуот хизмати маълум қилди.

Лойиҳа доирасида бозорлар фаолиятини такомиллаштириш, яширин иқтисодиётни бартараф этиш ва замонавий бошқарув механизмларини жорий этишга қаратилган комплекс чора-тадбирлар кўзда тутилган. Савдо жараёнларининг очиқлиги ва шаффофлигини таъминлаш мақсадида бозорлар босқичма-босқич рақамлаштирилади.

Шунингдек, бозор ҳудудлари замонавий инфратузилма талаблари асосида тўлиқ қайта қурилади ва қайта ташкил этилади. Барча иқтисодий, молиявий ҳамда назорат жараёнларини мувофиқлаштириш учун ягона бошқарув маркази вазифасини бажарадиган махсус ситуацион марказ ташкил этилиши режалаштирилган.