Ижтимоий тармоқларда Қирғизистондан Ўзбекистонга қарийб 27 тонна пиёз қайтариб юборилгани ҳақида тарқалган хабарлар асоссиз экани маълум бўлди. Мазкур ҳолат юзасидан ўтказилган тезкор ўрганиш натижаларига кўра, маҳсулот чегарадан қайтарилмаган.

Ўсимликлар карантин ва ҳимояси агентлигининг расмий муносабатига кўра, 26 тонна 978 килограмм пиёз Андижон вилоятидаги “Дўстлик” ОШСМ орқали Қирғизистонга экспорт қилинган. Юк халқаро талабларга мувофиқ лаборатория шароитида фитосанитар экспертизадан ўтказилиб, хавфсиз деб топилган ҳамда ижобий хулоса берилган.

Маълумотларга кўра, пиёз учун фитосанитар сертификат 16 январь куни карантин назоратидан сўнг расмийлаштирилган. Юк машинаси 17 январь куни соат 01:10 атрофида Қирғизистон чегарасига етиб борган. Аниқланишича, халқаро намунадаги фитосанитар сертификат йўлда ҳайдовчи томонидан йўқотилган.

Ҳужжат кейинчалик юк машинасининг кабинасидан топилиб, Қирғизистоннинг тегишли фитосанитар хизматига тақдим этилган. Шундан сўнг юк ҳеч қандай тўсиқларсиз Ўзбекистон ҳудудига киритилган.