Ассамблея давомида Осиё Олимпия Кенгаши Президенти лавозимига сайлов ўтказилиб, ушбу лавозимга бир овоздан Шайх Жавъан бин Ҳамад ол Соний сайланди. Янгидан сайланган президентнинг спорт соҳасидаги халқаро тажрибаси ва ташаббуслари кенг эътироф этилди.

Тадбирда Ўзбекистоннинг Осиё Олимпия Кенгаши билан ҳамкорлиги сўнгги йилларда янги босқичга кўтарилгани таъкидланди. Жумладан, 2022 йилда Кенгаш Ижроия қўмитасининг сессияси Тошкентда ўтказилгани, Ўзбекистон вакили илк бор Марказий Осиё бўйича вице-президент этиб сайлангани қайд этилди. Шунингдек, 2029 йилги Осиё Ёшлар ўйинларини Ўзбекистонда ўтказиш ҳуқуқи мамлакатга берилгани муҳим воқеа сифатида баҳоланди.

Анжуманда халқаро спорт ташкилотлари раҳбарлари, қатор давлатларнинг спорт соҳаси масъуллари ҳам иштирок этди. Халқаро олимпия қўмитаси раҳбарияти томонидан юборилган мурожаатда Осиё Олимпия Кенгашининг фаолияти юқори баҳоланди.

Ассамблея доирасида халқаро ва минтақавий спорт федерациялари билан ҳамкорликка оид ўнлаб келишувлар имзоланди. Ушбу битимлар спорт инфратузилмасини ривожлантириш, спорт мактаблари ва академиялар ташкил этиш, мураббийлар ва спортчилар тайёрлаш тизимини такомиллаштиришга қаратилган.

Шунингдек, Тошкентда “World Aquatics” федерациясининг минтақавий филиали очилгани ва Марказий Осиё антидопинг ташкилотларининг йиғилиши ўтказилгани қайд этилди. Бу ташаббуслар минтақада ҳалол спорт тамойилларини мустаҳкамлашга хизмат қилиши таъкидланди.

Анжуман якунларига кўра, Ўзбекистоннинг халқаро спорт майдонидаги нуфузи ортиб бораётгани, спорт дипломатияси ва олимпия ҳаракатида фаол иштирок этиб келаётгани алоҳида эътироф этилди.