Ўзбекистон суд-тиббий экспертизасида сунъий интеллект технологиялари жорий этилмоқда

Ўзбекистонда суд-тиббий экспертиза соҳасини модернизация қилиш ишлари изчил давом этмоқда. Соҳага замонавий рақамли ва илмий-техник ечимлар, жумладан сунъий интеллект технологияларини жорий этиш режалаштирилган. Бу ҳақда Соғлиқни сақлаш вазирлиги маълум қилди.

Маълум қилинишича, Президентнинг 2025 йил 8 сентябрдаги қарорига мувофиқ, суд-тиббий экспертиза тизимини босқичма-босқич янгилаш ишлари олиб борилмоқда. Ушбу жараён доирасида рақамлаштириш, замонавий ускуналар жорий этиш ва илғор хорижий тажрибадан фойдаланишга алоҳида эътибор қаратилган.

Айни пайтда Республика суд-тиббий экспертиза илмий-амалий марказида газ ва суюқлик хроматографияси масс-селектив детекторлар билан қўлланилмоқда. Бу усул биологик намуналарда синтетик наркотик ва кучли таъсир қилувчи моддаларни аниқлаш аниқлигини сезиларли оширишга хизмат қилмоқда.

Шунингдек, суд-биологик амалиётда биологик изларни тезкор таҳлил қилишга мўлжалланган экспресс-тестлардан фойдаланилмоқда. 2025 йилда эса марказ БМТнинг Наркотиклар ва жиноятчилик бўйича бошқармаси (UNODC) кўмагида Япониянинг Shimadzu Corporation компанияси томонидан ишлаб чиқарилган, қиймати 121 минг АҚШ доллари бўлган замонавий хромато-масс-спектрометр билан таъминланди.

Жорий йилда суд-тиббий экспертизаларда сунъий интеллект технологияларини жорий этиш режалаштирилган. Хусусан, Intelligent Sperm Detection номли ускунани харид қилиш кўзда тутилган бўлиб, у сперматозоидларни автоматик аниқлаш имконини беради. Бу эса экспертиза жараёнида инсон омили таъсирини камайтиришга хизмат қилади.

Бундан ташқари, марказ лабораторияларини ISO/IEC 17025 халқаро стандарти талаблари асосида аккредитациядан ўтказиш бўйича ишлар ҳам олиб борилмоқда. Ушбу стандартга мувофиқлик тадқиқотлар сифати ва хулосалар ишончлилигини халқаро даражада таъминлашга қаратилган.