Теннис. Мамлакатимизнинг биринчи рақамли ракеткаси Руминиядаги турнирда зафар қучди

Теннис бўйича мамлакатимизнинг биринчи рақамли ракеткаси Камилла Раҳимова Испания вакили Сара Тормо Соррибес билан жуфтликда Руминиянинг Клуж-Напока шаҳрида бўлиб ўтган WTA 250 тоифасидаги халқаро турнирнинг жуфтлик баҳсларида чемпионга айланди.

Мукофот жамғармаси 283 минг 347 АҚШ долларини ташкил этган мазкур мусобақанинг ярим финалида Камилла Раҳимова ва Сара Тормо Соррибес дуэти словениялик Вероника Эрьявец ҳамда франциялик Тьянцоа Сара Ражаона жуфтлигини 6:2, 6:7, 11:9 ҳисобида мағлуб этиб, финалга йўл олди.

Ҳал қилувчи финал учрашувида улар хитойлик Женг Сай ва Ванг Хиню жуфтлигига қарши кортга чиқиб, 7:6, 6:3 ҳисобида ғалаба қозонди.

Шу тариқа Камилла Раҳимова ва Сара Тормо Соррибес жуфтлиги мусобақанинг бош соврини билан бирга 250 очко ҳамда 13 минг 600 АҚШ доллари миқдоридаги пул мукофотини қўлга киритди.