Аввалроқ ижтимоий тармоқларда қиз гўёки 12 ёшда экани ва жиноятни унинг ўгай отаси содир этгани ҳақида хабарлар тарқалган эди. Болалар омбудсмани ушбу маълумотларни рад этди. Қайд этилишича, ҳозирда қиз 13 ёшда бўлиб, ҳомиладорлик олтинчи ойида аниқланган.

Маълумотларга кўра, жиноят иши Жиноят кодексининг 118-моддаси 4-қисми «14 ёшга тўлмаган шахсни зўрлаш» банди билан қўзғатилган. Гумонланувчи ўгай ота эмас, балки оилага таниш бўлган шахс экани билдирилмоқда. Унга нисбатан қамоққа олиш тарзидаги эҳтиёт чораси қўлланилган, тергов ҳаракатлари давом этмоқда.

Омбудсман ахборотида бола манфаатларини ҳимоя қилиш устувор вазифа экани, шунингдек айбдорга қонунчиликда назарда тутилган энг қатъий жазо чоралари қўлланилиши таъминланиши таъкидланган.

Амалдаги қонунчиликка мувофиқ, 14 ёшга тўлмаган шахсни зўрлаш 15 йилдан 20 йилгача озодликдан маҳрум этиш билан жазоланади. Шунингдек, 2026 йилга мўлжалланган Давлат дастурига кўра, 14 ёшгача бўлган шахсларга нисбатан жинсий зўравонлик учун умрбод озодликдан маҳрум қилиш жазосини жорий этиш назарда тутилган.