Украина МО билан С5+1 форматида ҳамкорлик қилишдан манфаатдор — Украина ТИВ раҳбари ўринбосари

Украина Ташқи ишлар вазирлиги ўз тузилмасида Марказий Осиё билан ишлаш бўйича алоҳида бошқарма ташкил этди ва минтақа мамлакатлари билан ҳамкорликни сезиларли даражада фаоллаштирмоқчи. Бу ҳақда Украина ташқи ишлар вазири ўринбосари Александр Мишенко 2 апрель куни Тошкентга ташрифи якунлари бўйича журналистларга маълум қилди, деб хабар бермоқда Gazeta мухбири.

«Мен Украина ТИВнинг Марказий Осиё мамлакатлари билан муносабатларни сезиларли даражада фаоллаштириш тўғрисидаги қарори муносабати билан Ўзбекистонга, ундан олдин эса Қозоғистонга келдим», — деди вазир ўринбосари.

Сафар давомида унга Украина ТИВнинг Марказий Осиё мамлакатлари билан алоқалар бўйича махсус вакили, Украинанинг Қозоғистондаги элчиси Виктор Майко ҳамроҳлик қилди.

Тошкентда Украина делегацияси Ўзбекистон ташқи ишлар вазирининг биринчи ўринбосари Баҳромжон Аълоев билан музокаралар ўтказди. Томонлар икки томонлама кун тартиби ва ҳамкорлик истиқболларини муҳокама қилди.

«Мен ТИВ раҳбариятига ва бутун мамлакатга Украинанинг ҳудудий яхлитлиги ва суверенитетини қўллаб-қувватлашдаги қатъий ва принципиал позицияси учун миннатдорлик билдирдим. Биз учун бу ҳар қандай давлат билан икки томонлама муносабатларни белгиловчи асосий масаладир», — деб таъкидлади Александр Мишенко.

Унинг сўзларига кўра, Ўзбекистон ва Украина «халқаро ҳуқуқ тамойилларига асосланади» ва бу масалада томонларнинг позициялари «мутлақо бир хил».

Ўзбекистон ва Украина ўртасида Украина ТИВ вакилларининг Тошкентга ташрифи билан амалга оширилган сўнгги сиёсий маслаҳатлашувлар 2021 йилда бўлиб ўтган эди. Александр Мишенко муносабатларнинг ҳозирги фаоллашувини Киевнинг минтақа билан ишлаш бўйича ёндашуви ўзгаргани билан изоҳлади.

У Украина Марказий Осиёни ягона минтақа сифатида кўришини ва унинг барча мамлакатлари билан дипломатик ишларни мувофиқлаштиришга урғу бераётганини таъкидлади.

«Биз бир нечта давлатлар билан сизлар Марказий Осиё доирасида амалга ошираётган лойиҳаларни бирлаштиришни истардик», — деди Мишенко. Унинг сўзларига кўра, Киев минтақанинг халқаро шериклар билан мавжуд ҳамкорлик формати — C5+1`га таянмоқда.

«Масалан, „Марказий Осиё — АҚШ“, „Марказий Осиё — Европа Иттифоқи“, „Марказий Осиё — Озарбайжон“ каби форматлар мавжуд. Биз ушбу халқаро иштирокчиларнинг барчаси билан стратегик шерик сифатида бу жараёнга қўшилишни истаймиз», — деди у.

Ушбу ёндашув доирасида Украинанинг минтақадаги дипломатик ваколатхоналарида ҳозирда кадрлар сиёсати қайта кўриб чиқилмоқда, дея қўшимча қилди вазир ўринбосари.

«Нима учун Ўзбекистонда ҳозирча Украина элчиси йўқ? Биз Ўзбекистонга шунчалик жиддий қараймизки, шунчаки кимнидир тайинлаб қўя олмаймиз. Шу сабабли жиддий саралаш жараёни кетмоқда. Талаб катта, рақобат бор. Менимча, вазир ва президент барча элчихоналаримизни тўлдириш учун ҳозирда бу масалани ҳал қилмоқда», — деб таъкидлади у.

ТИВ раҳбари ўринбосари Ўзбекистон ислоҳотлар ва жадал ривожланиш босқичидан ўтаётган бир пайтда ҳозирги вақт ҳамкорликни кенгайтириш учун қулай эканини айтиб ўтди.

Александр Мишенко алоқаларнинг фаоллашиши Ўзбекистон ва Украина ўртасидаги шерикликни янги босқичга олиб чиқишига ишонч билдирди.