Ўзбекистон ва Қозоғистон президентлари Бухорода учрашади
11 апрель куни Қозоғистон президенти Қасим-Жомарт Тоқаев амалий ташриф билан Ўзбекистонда бўлади ва айнан Бухорода олий даражадаги музокаралар бўлиб ўтади.
«Унда Ўзбекистон — Қозоғистон дўстлик, стратегик шериклик ва иттифоқчилик муносабатларини янада ривожлантириш масалалари кўриб чиқилади. Сиёсий мулоқотни, парламентлараро, ҳукуматлараро ва ҳудудлараро алоқаларни мустаҳкамлашга алоҳида эътибор қаратилади», — дейилади хабарда.
Акорда ҳам давлат раҳбарининг Ўзбекистонга ташрифи ва Шавкат Мирзиёв билан «норасмий учрашуви» ҳақида эълон қилди. «…минтақавий аҳамиятга молик долзарб масалаларни ҳам муҳокама қилиш режалаштирилмоқда», — дейди матбуот хизмати.
Шунингдек, етакчилар, Ўзбекистон томонига кўра, товар айирбошлаш ҳажмини ошириш, саноат кооперациясини чуқурлаштириш, транспорт, энергетика, сув ва экология соҳаларида қўшма лойиҳа ва дастурларни илгари суриш ҳамда маданий-гуманитар алмашинувни фаоллаштириш масалаларини муҳокама қилади.
Биргаликда тарихий обидаларни зиёрат қилиш, саноат корхоналари фаолияти ва маҳсулотлар кўргазмаси билан танишиш ҳам режалаштирилган.
Бугун эса Мирзиёев Бухоро вилоятини ижтимоий-иқтисодий ривожлантириш бўйича амалга оширилаётган ишлар ва истиқболли лойиҳалар билан танишади.