Британия бокси тарихидаги энг йирик жанг: Фьюри ва Жошуа тўқнашади

Профессионал бокснинг супер оғир вазн тоифасида собиқ Жаҳон чемпионлари, британиялик Тайсон Фьюри (35-2-1) ва Энтони Жошуа (29-4) 2026 йилнинг тўртинчи чорагида ўзаро тўқнаш келади. Бу ҳақда The Ring журналисти Майк Коппинжер маълум қилди.

Тайсон Фьюри (WBC, WBO, IBO, WBA Супер, The Ring, IBF собиқ чемпиони) ва Энтони Жошуа (IBF, WBA, WBO, IBO собиқ чемпиони) ўртасидаги тўқнашув йил сўнгида Лондон шаҳрида ташкил этилиши кутилмоқда.

“Сенсацион хабар: Турки ал аш-Шайх ижтимоий тармоқларда ‘Буюк Британиялик дўстлар, бу содир бўлмоқда, шартнома имзоланди’ деб ёзди. Менга етказишларича, бу узоқ кутилган улкан жанг ниҳоят амалга ошишини англатади”, дейди Коппинжер.

Ring Magazine маълумотларига кўра, мазкур тўқнашув Netflix платформасида намойиш этилади ва Британия бокс тарихидаги энг масштабли воқеага айланади. Шу ойнинг бошида Тайсон Фьюри россиялик Арсланбек Маҳмудов устидан ғалаба қозонганидан сўнг, ҳар икки боксчи ўртасида юзага келган даҳанаки жанг бўлажак қарама-қаршилик нақадар кескин ўтишидан дарак берган эди.

Коппинжер ушбу жангни ташкил этишда Турки ал аш-Шайхнинг хизматларини алоҳида эътироф этди:

“Канело Алварес – Теренс Кроуфорд, Олександр Усик – Тайсон Фьюри ёки Дмитрий Бивол – Артур Бетербиев жанглари каби, у яна бир йирик воқеани ташкил қила олди. Бу инсон яна бир бор имконсиз нарсани уддалади. Демак, Фьюри Жошуага қарши, жорий йилнинг тўртинчи чорагида, Ring Magazine ва Netflix тақдимотида”.

Эслатиб ўтамиз, ушбу жанг кўп йиллардан буён кутилаётган ва икки боксчининг украиналик мутлақ чемпион Олександр Усикдан учралган мағлубиятлари сабаб ортга сурилаётган эди. Усик энг муҳим титул жангларида ҳар икки чарм қўлқоп устасини икки мартадан енгишнинг уддасидан чиқди.

Манба: daryo.uz