Тошкент метросининг ер усти ҳалқа линияси янги иш жадвалига ўтди

1 майдан бошлаб Тошкент метросининг ер усти ҳалқа линиясида поездлар ҳаракати бир соат эртароқ — соат 5:00 дан бошланади. Бу ҳақда пойтахт метрополитени матбуот хизмати хабар қилди.

Эндиликда ер усти линияси иш жадвали метронинг бошқа линиялари билан уйғунлаштирилди. Шу билан бирга, ҳаракат якунланиш вақти ўзгаришсиз қолди — поездлар аввалгидек соат 23:00 гача қатнайди. Бошқа линияларда эса иш вақти тунги соат 00:00 гача давом этади.

Метрополитенда таъкидланишича, ушбу ўзгариш йўловчилар учун қулайликни ошириш ва эрталабки соатларда транспортдан фойдаланиш имкониятларини кенгайтиришга қаратилган.