Эрон президенти Масъуд Пезешкиённинг эҳтимолий истеъфоси ҳақида тарқалган хабарлар мамлакат сиёсий доираларида кенг муҳокамаларга сабаб бўлди.

Хорижий оммавий ахборот воситаларида тарқалган маълумотларга кўра, давлат раҳбари Олий раҳбар девонига истеъфо аризасини тақдим этган. Хабарларда айтилишича, президент мамлакатдаги муҳим сиёсий ва стратегик қарорларни қабул қилиш жараёнларидан амалда четлаштирилгани ҳамда асосий ваколатлар Ислом инқилоби муҳофизлари корпуси (IRGC) доирасидаги кучли гуруҳлар таъсирига ўтганини билдирган. Маълумотларга кўра, Пезешкиён бундай шароитда ҳукуматни самарали бошқариш ва ўз конституциявий вазифаларини бажариш имконияти чекланганини таъкидлаган. Шу муносабат билан у лавозимини тарк этиш истагини билдиргани айтилмоқда.

Сиёсий кузатувчилар сўнгги ойларда Эрон ҳукумати билан ҳарбий-хавфсизлик тузилмалари ўртасидаги муносабатлар мураккаблашиб бораётганини қайд этмоқда. Айрим таҳлилларда мамлакатда қарор қабул қилиш жараёнларида ҳарбий доираларнинг таъсири кучайгани ҳақида фикрлар билдирилмоқда.

Ҳозирча президентнинг эҳтимолий истеъфоси бўйича расмий тасдиқ мавжуд эмас. Шу боис тарқалаётган маълумотлар турли манбалар томонидан баҳсли ва тасдиқланмаган хабар сифатида кўрилмоқда.