Лондон мода ҳафталигида: Омар Мансур «Жонли тўқув дастгоҳи» коллекциясини тақдим этди

Омар Мансур Лондон мода ҳафталиги доирасида «The Living Loom» («Жонли тўқув дастгоҳи») коллекциясини тақдим этди. Бу дизайнернинг мода ҳафталигидаги 21-иштироки бўлди.

Коллекциянинг асосини қаддар ташкил этади. Органик пахтадан анъанавий тўқув дастгоҳларида қўлда тайёрланадиган мато уни яратувчи ҳунармандларнинг меҳнат изларини ўзида сақлайди. Матонинг юзаси тўлиқ бир текис бўлмагани унга ўзига хос табиий фактура ва хусусият беради.

Мансур коллекцияда материалнинг келиб чиқиши, уни ишлаб чиқариш жараёни ва мато ортида турган инсонлар меҳнатига эътибор қаратган.

Қаддар Панжобнинг Камалия ҳудудидаги ҳунармандлар томонидан тўқилади. Қўлда тўқиш анъанаси бу ерда авлоддан авлодга ўтиб келмоқда. Саноат ишлаб чиқариши тўқимачилик соҳасини ўзгартираётган бир пайтда, «The Living Loom» анъанавий ҳунармандчиликни замонавий мода билан уйғунлаштиради.

Коллекцияда тоза чизиқлар ва нафис шакллар устувор. Приталён жакетлар, пальто-кўйлаклар, А-силуэтли либослар ҳамда узун, тўғри шаклдаги кўйлаклар кийим конструкциясини намоён этади. Фил суяги туси ва қора ранг матонинг табиий фактурасини яққол кўрсатишга хизмат қилади. Учбурчак шакллар эса Ҳинд водийси цивилизациясига оид артефактлар ва кулолчилик буюмларида учрайдиган геометрик нақшлардан илҳомланган.

Органик пахта, қўлда тўқиш, материалларни масъулиятли танлаш ва замондан ташқари дизайн коллекциянинг асосий жиҳатларини ташкил этади. Мансур учун барқарорлик анъанавий ҳунарларни асраш ва ҳунармандлар жамоаларини қўллаб-қувватлашни ҳам англатади.

Камалиядаги қўл тўқув дастгоҳида бошланган жараён кейин ательеда давом этади ва халқаро аудиторияга тақдим этилади. Ҳар бир либос мато яратилишига сарфланган вақт, меҳнат ва инсон қўлининг меҳрини ўзида мужассам этади.

«The Living Loom» коллекцияси орқали Омар Мансур Покистоннинг тўқимачилик меросини замонавий халқаро мода контекстига олиб чиқади.

Бу ҳикоя матодан бошланади. Матодан эса аввал — тўқув дастгоҳидан.