АҚШ Адлия вазирлиги маълумотига кўра, Ансари 2026 йил август ойида Тбилисида қўлга олинган. 23 сентябрь куни у Нью-Йорк Шарқий округига экстрадиция қилинган. Яқин вақтларда у Бруклиндаги федерал судда суд олдида ҳозир бўлиши керак.

Айблов ҳужжатларига кўра, Ансари Бруклинда бўлган вақтида асосан радикаллашган шахслардан иборат гуруҳга раҳбарлик қилган. АҚШ тергови версиясига кўра, гуруҳ аъзолари ИШИД ёки «Ан-Нусра фронти» сафига қўшилиш учун Сурияга боришни режалаштирган.

Тергов маълумотларига кўра, «Чайхона» деб аталган гуруҳ Сурияга бориш учун маблағ тўплаган, шунингдек, жанг қилиш учун кетган шахсларнинг оилаларига, жумладан ҳалок бўлганларнинг бева аёлларига молиявий ёрдам кўрсатган.

АҚШ томони маълум қилишича, 2013 йилда тўпланган маблағлар ҳисобидан камида уч нафар шахснинг Сурияга бориши молиялаштирилган. Иш материалларида қайд этилишича, кейинчалик уларнинг барчаси ҳалок бўлган.

Суд ҳужжатларига кўра, 2016 йил май ойида, гумон қилинган шерикларидан бири қўлга олинганидан бир неча кун ўтиб, Ансари Туркияга бир томонлама авиачипта билан учиб кетган. Шундан сўнг у қидирувга берилган.

2021 йил ноябрь ойида Бруклиндаги федерал катта ҳакамлар ҳайъати унга нисбатан айбловларни илгари сурган.

Агар судда айбдор деб топилса, Ансари 35 йилгача озодликдан маҳрум қилиниши мумкин.

Тергов ишларини ФБР Нью-Йорк ҳуқуқни муҳофаза қилувчи органлари ва АҚШнинг бошқа идоралари билан ҳамкорликда олиб борган. Айбланувчини қўлга олиш ва экстрадиция қилиш жараёнида АҚШ Адлия вазирлиги, ФБРнинг Тбилисидаги ходимлари ҳамда Грузия прокуратураси вакиллари ҳам иштирок этган.

Шу билан бирга, айбловлар АҚШ тергов органларининг даъволари ҳисобланади. Ансари айбдор ёки айбсиз эканлиги ҳақидаги якуний қарорни суд қабул қилади.