Туркияда юртдошларини алдаб, пулларини ўзлаштириб юборган ўзбекистонлик эркак қўлга олинди

У бир нечта фуқаролардан АҚШга юбориш учун $15 минггача олиб, алдаб кетган. Эркак бундан ташқари одам савдоси жиноятида ҳам айбланмоқда.

Жорий йилнинг 6 май куни Ўзбекистон ва Туркия ИИВ ҳамкорлигида амалга оширилган тезкор тадбир натижасида фирибгарлик ва одам савдоси жиноятини содир этишда айбланаётган 1979 йилда Самарқанд вилоятида туғилган Озод Раҳимов исмли шахс Истанбул шаҳрининг Фатих туманида қўлга олинди. Бу ҳақда Ўзбекистоннинг Истанбулдаги Бош консулхонаси хабар бермоқда.

Қайд этилишича, О.Рахимов Самарқанд вилоятида фуқароларнинг кўп миқдордаги пул маблағларини фирибгарлик йўли билан ўзлаштиришда, шунингдек Истанбул шаҳрида бўлган даврида 2022-2023 йиллар мобайнида бир қанча Ўзбекистон ва Тожикистон фуқароларини Туркия-Испания-Никарагуа-Мексика йўналиши бўйлаб АҚШга юборишни ваъда қилиб, уларнинг ҳар биридан 10-15 минг АҚШ доллари олган. Аммо, ваъдасини бажармасдан, ўзининг шахсий манфаатларига ишлатиб юборганликда айбланмоқда.

Ушбу шахснинг жиноий хатти-ҳаракатларидан жабр кўрган ўзбекистонликлардан Бош консулхонага ёки Ўзбекистон Ички ишлар вазирлигига хабар бериш сўралади.