Ипотека субсидиялари учун аризаларни қабул қилиш қайта ишга туширилди

Янги уй-жой сотиб олиш ва якка тартибдаги уй-жойларни реконструкция қилиш учун субсидиялар олишга аризалар 1 ноябргача онлайн тарзда топширилиши мумкин.

Ягона интерактив давлат хизматлари порталида бугундан бошлаб ипотека кредитига давлат субсидияси олиш учун ариза топшириш хизмати қайта йўлга қўйилди.

Аризалар янги тасдиқланган параметрлар бўйича 2024 йил 15 майдан 1 ноябргача қабул қилинади. Ариза 19 иш куни ичида кўриб чиқилади.

Фуқаролар Тошкент шаҳри, вилоятлар ва Қорақалпоғистонда уй-жой сотиб олиш учун субсидия олишлари мумкин бўлади.

Эслатиб ўтамиз, мазкур ташаббус учун 27 минг субсидия учун бюджетдан 2,3 триллион сўм ажратилган эди. Уларнинг 20 мингтаси янги уй-жой сотиб олишга, 7 мингтаси якка тартибдаги уй-жойларни қуриш, реконструкция қилиш ва таъмирлашга ажратилган.