Тошкентда момақалдироқ туфайли бир нечта рейслар муқобил аэродромларга йўналтирилди

Россия, Германия, Венгрия, Озарбайжон шаҳарлари ва яна бошқа бир нечта шаҳарлардан учиб келаётган самолётлар Тошкентга қўна олмади.

“Тошкент” аэропортида 7 июль куни маҳаллий вақт билан соат 19:44 да ноқулай об-ҳаво шароити (ёмғир, аэродром устида момақалдироқ) туфайли ҳаво кемаларининг қўниши ва учишига чекловлар жорий этилди. Бу ҳақда аэропорт Матбуот хизмати хабар қилди.

Ноқулай об-ҳаво шароити туфайли бир нечта рейслар муқобил аэродромларга йўналтирилди. Хусусан, бортида 183 йўловчи бўлган Санкт-Петербург — Тошкент йўналиши бўйича учган HY — 634, Мюнхен — Тошкент йўналиши бўйича учган ва бортида 116 йўловчи бўлган HY — 236 рейслар Самарқанд аэропортига қўнди.

Шунингдек, учта юк рейслари муқобил аэродромларга йўналтирилди. HY — 3124 Будапешт-Тошкент рейси Навоийга, AZG — 6941 Боку – Тошкент рейси Наманган аэропортига, MFX — 656 Урумчи — Тошкент рейси Самарқандга қўнди.

Айни дамда Тошкент аэропортида об-ҳаво шароити барқарорлашди. Ўрнатилган чекловлар олинди.