Ўзбекистонда 1 августдан электр энергиясини ҳисоблашнинг янги биллинг тизими ишга туширилади
Янги тизим кадастр маълумотларини ва бир киши учун қайд этилган ҳисоблагичларни ўз ичига олади. Ушбу тизим аллақачон Тошкент шаҳрининг Яккасарой туманида тест режимида жорий қилинган.
Маълум бўлишича, ҳозирда истеъмолчиларга етказиб берилган электр энергиясини ҳисоблаш 2012 йилда жорий этилган биллинг тўлов тизими асосида амалга оширилмоқда.
Маълум қилинишича, замонавий ҳисоб-китоб тизими 2022 йил охирида ишлаб чиқилган. Янги тизим аллақачон Тошкент шаҳрининг Яккасарой туманида тест режимида ишга туширилган.
Амалдаги тизимда абонент маълумотлари — тўлиқ исм, паспорт маълумотлари ва ҳисоб рақами мавжуд бўлса, янгисига кадастр маълумотлари ва бир кишига қайд этилган ҳисоблагичлар сони каби маълумотлар қўшилади.
Янги тизим назорат ишларини олиб бориш мақсадида истеъмолчиларнинг шикоят ва таклифларини ҳамда уларнинг сонини ҳисобга олади.
Тизим учун мобил илова ҳам ишлаб чиқилмоқда. У орқали амалга оширилган тўловлар ва истеъмол қилинган электр энергияси миқдори ҳақидаги маълумотларни онлайн тарзда олиш мумкин бўлади.