Париж-2024. Диёра Келдиёрова ўзбек спорти тарихида бўлмаган натижага эришди

Диёра Келдиёрова Ўзбекистон тарихида ёзги Олимпиада баҳсларида олтин ёки кумуш медал олган илк аёл спортчи сифатида тарихга киради. Ҳали шу чоққача аёл спортчиларимиздан ҳеч ким бундай муваффақиятга эришмаган эди.

Ҳозиргача ёзги Олимпия ўйинларида Екатерина Хилко бронза медалини қўлга киритган (Пекин — 2008) ва аёллар орасида медал олган ягона спортчи эди.

Лекин яна бир фактни ҳам айтиш керак, Ўзбекистон тарихида умумий Олимпиададаги илк медални ва бўлиб ҳам олтин медални аёл киши қўлга киритган. 1994 йили Лиллиҳаммер шаҳрида ўтган қишки Олимпиада баҳсларида Лина Черязева фристайл мусобақасида чемпион бўлган эди.