590 кг қовун истеъмолга яроқсиз эканлиги аниқланди — Санэпидқўмита

Таъкидланишича, қовунда нитрат даражаси белгиланган меъёрдан юқори эканлиги ҳамда органолептик хусусиятлари бузилган.

Санэпидқўмита Тошкент шаҳар бошқармаси Бектемир туман бўлими мутахассислари ҳамда Ветеринария-санитария экспертиза лабораторияси ходимлари билан ҳамкорликда «Food City» деҳқон бозори ҳудудида полиз экинлари савдоси юзасидан навбатдаги ўрганиш ишлари амалга оширилди. Бу ҳақда Санэпидқўмита Тошкент шаҳар бошқармаси Ахборот хизмати хабар қилди.

Ўрганиш давомида сотилаётган қовун маҳсулотида нитрат даражаси белгиланган меъёрдан юқори эканлиги ҳамда органолептик хусусиятлари бузилганлиги аниқланди.

Натижада 590 кг миқдордаги қовун истеъмолга яроқсиз деб топилиб, ўрнатилган тартибда савдодан олдирилиб, бракераж қилинди.

Маълумот ўрнида, Санитария қоида ва меъёрларига кўра, тарвуздаги нитрат миқдори килограммига 60 мг, қовунда эса 90 мг бўлиши меъёр ҳисобланади.