Президент Бухородаги янги халқаро аэропорт қурилиши билан танишди

Давлат раҳбари мазкур аэропортда соатига 8 та самолёт келиш-кетишига имконият яратиш зарурлигини таъкидлади.

Жорий йилнинг 9 октябрь куни Президент Шавкат Мирзиёев Бухоро халқаро аэропорти қурилишига оид тақдимот билан танишди.

Таъкидланишича, Бухородаги аэропорт аҳоли ва туристлар талабига жавоб бермаяпти. Мазкур аэропорт соатига 400 нафар ёки йилига 1 млн йўловчига хизмат кўрсата олади, холос.

Парвозларни бошқариш ва йўловчиларга хизмат кўрсатиш тизимлари, кутиш-кузатиш заллари эскиргани қатновларни кўпайтириш имконини чеклаяпти. Аксарият сайёҳлар Бухорога бориш учун Тошкент, Самарқанд ёки Урганч аэропортларига қўнишга мажбур бўлаяпти. Масалан, 9 ойда Бухорога ташриф буюрган 1 млндан зиёд хорижий туристларнинг 95 фоизи поезд ёки автомобилда борган.

Шу боис жорий йил 31 майда Президентнинг вилоятга ташрифи чоғида Бухоро туманида янги халқаро аэропорт қурилиши бошланган эди.

Давлат-хусусий шериклик асосидаги ушбу лойиҳа доирасида жаҳон стандартларига мос аэропорт ташкил этилади. Соатига 1 минг 200 нафар йўловчига хизмат кўрсатиш имконияти яратилади. Йўловчи ва ҳаво кемаларига сервис сифатини ошириш орқали янги халқаро авиакомпаниялар жалб қилинади.

Тақдимотда лойиҳанинг техник-иқтисодий жиҳатлари тўғрисида ахборот берилди.

Давлат раҳбари янги аэропортда ўтказувчанлик қобилиятини 2 баробар ошириб, соатига 8 та самолёт келиш-кетишига имконият яратиш зарурлигини таъкидлади.

Бундан ташқари, терминалнинг қулайликлари, ички ва ташқи қиёфаси бўйича тавсиялар берилди.