Тошкентдаги "Чорсу" бозорида 9 кг сифатсиз жигар маҳсулоти савдодан олинди — СЭС

Аввалроқ, Қозоғистонлик тиктокер бозордаги гўштларни видеога олиб, танқидий фикрларини билдирган эди.

Ижтимоий тармоқларда «Чорсу бозорида гўшт маҳсулотларини назорат қиладиганлар (СЭС) йўқми?» сарлавҳаси остида видеолар тарқалиб, кенг муҳокамаларга сабаб бўлган эди. Ҳолат юзасидан Санепидқўмита Тошкент шаҳар бошқармаси расмий муносабат билдирди.

Маълум қилинишича, Чорсу деҳқон бозорида ҳам доимий фаолият юритувчи лабораториялар мавжуд бўлиб, бу ерда гўшт маҳсулотларининг ветеринария-санитария экспертизаси амалга оширилади.

Шайхонтоҳур туман бўлими мутахассислари, ИИБ ва бозор маъмурияти билан ўрганиш давомида фуқароларга ажратилган йўлакда санитария қоидаларига зид равишда, ҳеч қандай ҳужжатсиз гўшт маҳсулоти (жигар) сотилаётгани маълум бўлган.

«Шу сабабли 9 кг жигар маҳсулоти савдодан олиниб, ўрнатилган тартибда йўқ қилиш чоралари кўрилди»,- дейилади хабарда.