"Қўйлиқ" деҳқон бозорида қурилиш бошланди. Бозор ёпиладими?

Тошкент шаҳар ҳокимлиги мазкур ҳолатга изоҳ берди.

Аввалроқ ижтимоий тармоқларда «Қўйлиқ» бозоридаги расталар бузиб ташлангани акс этган видеолар ижтимоий тармоқларга сиздирилди. Шу билан бирга, демонтаж ишлари тунги вақтда олиб борилаётгани айтилмоқда.

Тошкент шаҳар ҳокимлиги матбуот хизматининг хабар беришича, «Қўйлиқ» бозорининг муқобил савдо жойларини тайёрлаш зарурати туфайли илгари тўхтатилган қисмини қайта ташкил этиш ва ободонлаштириш ишлари қайта тикланди.

Маълум қилинишича, айни пайтда бозор ҳудудида тадбиркорлар учун янада тартибли шароитлар яратилмоқда, инфратузилма модернизация қилиниб, санитария ҳолати яхшиланмоқда. Шу билан бирга, бозорда савдо давом этмоқда.

«Бозор ёпилмаяпти, унинг фаолияти тартибга солиш, санитария ҳолатини яхшилаш, инфратузилмани янгилаш ва умумий хавфсизлик даражасини оширишга эътибор қаратган ҳолда оптималлаштирилмоқда,» — дейилади ҳокимлик хабарида.

Маъмурият, шунингдек, бозор ҳудудида ислоҳотлар бошланишидан олдин кўплаб муаммолар тўпланиб қолганини таъкидлади. Улар орасида криминоген омиллар, эскирган коммуникациялар туфайли юзага келган кичик ёнғинлар, санитария меъёрларининг бузилиши ҳамда қулайлик ва одамлар саломатлигига хавф солувчи тартибсиз савдо ҳолатлари мавжуд эди.

«Бу ҳолатларни эътиборсиз қолдириб бўлмасди. Шу боис бозорни халқаро ва замонавий шаҳар стандартларига мослаштириш бўйича қарор қабул қилинди. Ишончимиз комилки, барча ишлар якунлангач, ушбу ҳудуд ҳам тадбиркорлар, ҳам ташриф буюрувчилар учун янада қулай, хавфсиз ва шинам бўлади,» — дейилади ҳокимлик хабарида.