«Prague Masters». Ўзбек дербисида дуранг қайд этилди

Чехия пойтахти Прага шаҳрида шахмат бўйича «Prague Chess Festival» турнири давом этмоқда. Мусобақанинг «Masters» гуруҳида иштирок этаётган ўзбекистонлик икки шахматчи — Нодирбек Абдусатторов ва Нодирбек Ёқуббоев кеча 6-тур доирасида ўзаро тўқнаш келишди.

Баҳс давомида вазият мутлақо тенглигича сақланиб турди. 47-юришга келиб мусобақа ҳаками юришлар 3 марта такрорланганини қайд этди ва томонлар дурангга имзо чекишди.

Нодирбек Абдусатторов ушбу дурангдан кейин ўз очколарини 4 тага етказди ва мусобақада 2-ўринни эгаллаб турибди. Нидерландиялик Йорден ван Форест 4,5 очко билан пешқадамликни қўлга олган. Абдусатторов бугун айнан ван Форестга қарши дона суради.

Нодирбек Ёқуббоев эса 2,5 очко билан 8-ўринни эгаллаб турибди. У бугун ҳиндистонлик Аравинд Читамбарамга қарши қора доналарда ўйнади.

Манба: stadion.uz