Робахон Маҳмудова Ўзбекистон Олий суди раиси этиб сайланди

Ўзбекистон Олий судининг янги раиси этиб Робахон Анваровна Маҳмудова сайланди. Сенат уни 18 июнь куни президент Шавкат Мирзиёев тақдимномасига биноан бўлиб ўтган йиғилишда сайлади.

Робахон Маҳмудова 67 ёшда. У 2024 йил январидан буён «Адолат» социал-демократик партиясига раҳбарлик қилиб келмоқда. Ундан аввал — 2020 йил июлидан бошлаб Олий суд раисининг биринчи ўринбосари — маъмурий ишлар бўйича судлов ҳайъати раиси лавозимида ишлаган.

2023 йилда у «Адолат» партиясидан навбатдан ташқари президент сайловида иштирок этган ва 4,43% овоз тўплаб, давлат раҳбари этиб қайта сайланган Шавкат Мирзиёевдан кейин иккинчи ўринни эгаллаган. Сайловолди кампанияси ва сайловлар даврида унинг судьялик ваколатлари тўхтатиб турилган эди.

Робахон Маҳмудова сайловолди дастурида судьялар сонини кўпайтириш ва уларнинг ихтисослашувини кенгайтириш, адвокатура институтини кучайтириш, ҳуқуқни муҳофаза қилувчи органлар фаолиятининг эскирган моделини ўзгартириш, тиббиётни тижоратлаштиришдан воз кечиш ва ажрашишларнинг олдини олишни илгари сурган.

Робахон Маҳмудова Тошкент давлат университетининг ҳуқуқшунослик факультетини тамомлаган (1983 йил). У Фарғона вилояти жиноят ишлари бўйича суди раиси ва вилоят бўйича Президент халқ қабулхонаси мудири лавозимларида ишлаган. Шунингдек, Сенатнинг фан, таълим ва соғлиқни сақлаш масалалари қўмитаси раиси бўлган.

Олий суднинг аввалги раҳбари Бахтиёр Исломов шу куни муддатидан олдин лавозимидан озод этилди. Унинг ваколатлари 2027 йил август ойида тугаши керак эди.

Июнь ойи бошида президент ҳузурида суд тизимида коррупцияга қарши кураш масалалари муҳокама қилинган эди. Ўшанда Шавкат Мирзиёев Олий суд тузилмасида Комплаенс-назорат хизматини ташкил этиш, коррупцияга бардошлиликни диагностика қилиш, судьяларнинг манфаатлар тўқнашуви, даромадлари ва мол-мулки бўйича декларациялар тизимини жорий этиш ҳамда бошқа ўзгаришларни назарда тутувчи фармонни имзолаган.