Расман. Нурсултон Рўзибоев “веном”га қарши жанг қилади

Ўзбекистонлик аралаш жанг санъати устаси, UFC ўрта вазн тоифасида 15-рақамли жангчи, 32 ёшли Нурсултон Рўзибоев 5 сентябрь куни Франциянинг Париж шаҳрида бўлиб ўтадиган UFC Fight Night турнири доирасида октагонга кўтарилади.

Рўзибоевнинг рақиби англиялик Майкл “веном” Пейж бўлади. 39 ёшли Пейж UFC’да 2024 йил 9 мартдан бери фаолият юритиб келмоқда. Ҳозиргача у промоушенда 4 та ғалаба ва 1 та мағлубият қайд этган. У сўнгги жангини 2026 йил 21 март куни Сем Паттерсонга қарши ўтказган ва ҳакамларнинг якдил қарорига кўра ғалаба қозонган. Унинг MMA рекорди 25 та ғалаба ва 3 та мағлубиятдан иборат. Ушбу беллашув UFC ўрта вазн тоифасидаги рейтинг жанги бўлади.

Рўзибоев ҳозирга қадар фаолияти давомида 50 та жанг ўтказиб, улардан 37 тасида ғалаба қозонган, 9 марта мағлуб бўлган ва 2 марта дуранг қайд этган. Шунингдек, унинг 2 та жангги натижаси бекор қилинган. Пейжга қарши баҳс Рўзибоевнинг UFC’даги еттинчи жангига айланади. Бунгача у ушбу промоушенда 6 маротаба октагонга кўтарилиб, 5 та ғалаба ва 1 та мағлубият қайд этган.

Маълумот учун, Рўзибоев сўнгги бор 27 июнь куни россиялик Андрей Пуляевга қарши октагонга кўтарилган ва 1-раундда бўғиш усули билан мағлуб этган.

Манба: daryo.uz