“Алла” илмий-ижодий экспедицияси иш бошлади

Болалар контентини ривожлантириш маркази буюртмаси билан ўзбек миллий меросининг ажралмас қисми бўлган аллаларни асл ижросида аудио ва видео форматда ёзиб олишга қаратилган “Алла” илмий-ижодий экспедицияси ўз фаолиятини бошлади.

Бугунга қадар ўзбек аллалари ягона тизимда жамланмагани сабабли, айрим намуналарнинг унутилиб, йўқолиб кетиш хавфи мавжуд. Шу боис, лойиҳанинг асосий мақсади ҳудудларга хос аллаларнинг ўзига хос оҳанги, талаффузи ва ижро анъаналарини сақлаб қолишдан иборат.

Йиғилган намуналар “Алла” ягона миллий платформасига жойлаштирилиб, келажак авлодлар учун сақланади ҳамда фарзандига миллий аллаларни эшиттиришни истаган ота-оналар учун ишончли манба вазифасини ўтайди.

Айни пайтда ижодий гуруҳ Тошкент шаҳри ва Тошкент вилоятида тасвирга олиш ишларини олиб бормоқда. Кейинги босқичларда экспедиция мамлакатнинг бошқа ҳудудларида ҳам давом этади.