Ўзбекистон автомобиль бозорида пасайиш кузатилмоқда, Хитой брендлари улушини оширмоқда

2026 йил январь–июль ойларида Ўзбекистонда 210 837 дона автомобиль сотилди. Бу ўтган йилнинг шу даврига нисбатан 7 940 донага ёки 3,6 фоизга кам. Бозордаги салбий динамика кетма-кет тўртинчи ой давом этмоқда.

Июль ойида 31 324 дона автомобиль сотилди. Бу июнь ойига нисбатан 4,7 фоиз кўп. Бироқ 2025 йил июлидаги кўрсаткич билан солиштирганда, савдо ҳажми 30 фоизга камайган.

Шу билан бирга, автомобиль бозоридаги брендлар улуши ҳам ўзгармоқда. UzAuto Motors’нинг бозордаги улуши бир йилда 81,5 фоиздан 74,6 фоизга тушди.

ADM’нинг улуши эса 11,3 фоиздан 12,8 фоизга ошди. Компания портфелида Kia улуши 0,7 фоиз, Haval 0,5 фоиз ва Changan 0,3 фоизга кўпайди.

BYD эса бозордаги улушини қарийб икки баравар оширди. Компания улуши 5,6 фоиздан 10 фоизга етди.

Январь–июль ойлари якунларига кўра, Хитой автомобиль брендларининг умумий бозордаги улуши 17,8 фоизни ташкил этди. Ўтган йилнинг шу даврида бу кўрсаткич 11,6 фоиз бўлган.

Июль ойида июнь билан таққослаганда, Kia ва BYD бозордаги улушини 1,8 фоиздан оширди. Haval улуши эса 0,4 фоизга кўпайди. Chevrolet ва Chery энг катта қисқаришни қайд этди. Уларнинг улуши мос равишда 3,6 ва 0,9 фоизга камайди.

2026 йилдаги асосий тенденциялардан бири B-сегмент седанлари савдосининг қисқариши бўлди. Январь–июль ойларида ушбу сегментда 70 мингдан ортиқ автомобиль сотилди. Ўтган йилнинг шу даврида бу кўрсаткич 87 минг донани ташкил этган.

Натижада B-сегмент седанларининг бозордаги улуши 40 фоиздан 34 фоизга тушди.

Енгил тижорат автомобиллари сегментида ҳам савдо ҳажми қисқарди. Январь–июль ойларида 62,8 мингта LCV сотилган. 2025 йилнинг шу даврида эса бу кўрсаткич 69,5 мингта бўлган. Шу тариқа, савдо 9,6 фоизга камайган.

Бироқ B-SUV сегментидаги ихчам кроссоверларга талаб ортиб бормоқда. 2026 йилнинг дастлабки етти ойида 47,9 мингта B-SUV сотилди. Ўтган йилнинг шу даврида бу кўрсаткич 37,7 мингтани ташкил этган.

Натижада B-SUV сегментининг бозордаги улуши 5,5 фоизга ошиб, 22,7 фоизга етди.

Умуман, Ўзбекистон автомобиль бозори таркибий ўзгаришлар босқичидан ўтмоқда. Истеъмолчилар орасида қимматроқ автомобилларга бўлган талаб аста-секин ортиб бормоқда.

Бу тенденцияга автомобиль харидини молиялаштириш имкониятларининг кенгайиши, молиявий маҳсулотларнинг ривожланиши ва аҳоли харид қобилиятининг ошиши каби омиллар таъсир кўрсатаётган бўлиши мумкин.