Тошкентда ўтказиладиган III Марказий Осиё очиқ чемпионатида 9 мамлакат енгил атлетикачилари иштирок этади
23–25 август кунлари Тошкент шаҳри енгил атлетика бўйича минтақавий марказга айланади. III Марказий Осиё очиқ чемпионатида тўққиз мамлакатдан спортчилар иштирок этади. Ўзбекистон шарафини ўз майдонида 188 нафар атлет ҳимоя қилади.
Уч кун давомида пойтахт стадионларида енгил атлетиканинг деярли барча турлари бўйича медаллар ўйналади. Мусобақа дастуридан спринт, ўрта ва узоқ масофага югуриш, тўсиқлар оша югуриш ва стипл-чейз, узунликка, баландликка ва уч ҳатлаб сакраш, ядро ирғитиш, диск, босқон ҳамда найза улоқтириш каби йўналишлар ўрин олган.
Дастурдаги энг динамик ва томошабоп турлардан бири бўлган 4×400 метрга аралаш эстафета ҳам алоҳида эътибор марказида бўлади.
23 ва 24 август кунлари спортчилар эрталаб ва кечқурун стартларга чиқади. Финал баҳслари 25 август куни эрталаб якунланади.
Чемпионатда иштирок этиш учун Ўзбекистон, Қозоғистон, Қирғизистон, Тожикистон, Туркманистон, Таиланд, Сингапур, Грузия ва Саудия Арабистони жамоалари ариза топширган.
Энг катта хорижий делегацияни Қозоғистон юбормоқда. Унинг спортчилари кўплаб йўналишларда Ўзбекистоннинг кучли енгил атлетикачиларига рақобат кўрсатади.
Тошкентдаги Олимпия шаҳарчаси чемпионатнинг асосий майдонига айланади. 10 минг томошабинга мўлжалланган стадион иштирокчиларга пойтахтнинг замонавий спорт иншоотларидан бирида медаллар учун курашиш имконини беради.
Айрим техник йўналишлар бўйича баҳслар Ўзбекистон Енгил атлетика федерацияси стадионида ўтказилади.
Чемпионатнинг асосий ташкилотчиси — Марказий Осиё югуриш ва юриш академияси. Мусобақани ташкил этишда Ўзбекистон ва Марказий Осиё спорт ташкилотлари ҳам иштирок этмоқда.
Ташкилий ва ҳакамлар гуруҳи таркибига ўзбекистонлик мутахассислар, шунингдек, халқаро ва минтақавий даражадаги экспертлар жалб қилинган.
Марказий Осиё югуриш ва юриш академияси директори Шуҳрат Усмоновнинг таъкидлашича, Тошкентдаги чемпионат ёш атлетлар учун нафақат медаллар учун кураш, балки халқаро рақобат тажрибасини орттириш имконияти ҳамдир.
Мусобақа спортчиларнинг 2027 йилги енгил атлетика бўйича Осиё чемпионати ва 2028 йил Лос-Анжелес Олимпиадасига тайёргарлик жараёнида ҳам муҳим босқич бўлиб хизмат қилади.
Тошкент минтақавий очиқ чемпионатни ўтказиш бўйича тажрибага эга. 2024 йилда Ўзбекистон терма жамоаси мусобақада 69 та медаль — 18 та олтин, 28 та кумуш ва 23 та бронза медалини қўлга киритган.
Бу йилги чемпионат ҳам мазкур анъанани давом эттириши кутилмоқда. Бироқ мусобақанинг аҳамияти медаллар сони билан чекланмайди.
Турнир спортчилар учун ўз майдонида халқаро рақобат тажрибасини ошириш, мутахассислар учун тажриба алмашиш, Тошкент учун эса Марказий Осиёдаги йирик спорт тадбирлари маркази сифатидаги мавқеини мустаҳкамлаш имконини беради.