Афсонавий қиличбоз Собир Рўзиев вафот этди
Собиржон Сабитович Рўзиев 1953 йил 15 июнда Фрунзе вилоятининг Беловодское қишлоғида туғилган. У СССРда хизмат кўрсатган спорт устаси унвонига сазовор бўлган.
Собир Рўзиев қиличбозлик билан Тошкентда шуғуллана бошлаган. У 1976 йилги Олимпиадада индивидуал баҳсларда 4-ўринни эгаллаган.
1980 йил Москва Олимпиадасида ҳам индивидуал баҳсларда 4-ўринни қайд этган. Жамоавий баҳсларда эса кумуш медални қўлга киритган.
Спортчи жаҳон чемпионатларида жамоавий баҳсларда икки марта олтин, бир марта кумуш ва бир марта бронза медалини қўлга киритган. 1980 йилда СССР чемпиони бўлган.
Спортчилик фаолиятини якунлаганидан сўнг Собир Рўзиев Ўзбекистон қиличбозлик федерацияси ҳамда Миллий олимпия қўмитаси фаолиятида раҳбарлик лавозимларида ишлаган.
У 1992–1995 йилларда Ўзбекистон Республикаси Жисмоний тарбия ва спорт давлат қўмитаси раиси, 1995–2003 йилларда эса Ўзбекистон Миллий олимпия қўмитаси президенти лавозимларида фаолият юритган.
Собир Рўзиев «Ўзбекистон Республикасида хизмат кўрсатган спортчи» фахрий унвони билан ҳам тақдирланган.