Ҳисоб палатаси ва Президент администрациясида кадрлар ўзгариши юз берди

Ўзбекистон Ҳисоб палатаси раҳбариятида ҳамда Президент администрациясининг Комплаенс хизматида кадрлар ўзгариши юз берди. Ҳисоб палатаси раисининг икки нафар ўринбосари янги лавозимларга тайинланди, яна икки нафар мулозим идора раҳбари ўринбосари лавозимларини эгаллади.

Тегишли фармойишлар Президент администрацияси раҳбари томонидан имзоланди, деб хабар берди давлат раҳбарининг матбуот котиби Шерзод Асадов.

Улуғбек Миркамалович Арипов Ҳисоб палати раисининг комплаенс ва ички коррупцияга қарши назорат бўйича ўринбосари этиб тайинланди. Тайинлов муносабати билан у Президент администрацияси Комплаенс хизматининг сектор мудири лавозимидан озод этилди.

Илгари Улуғбек Арипов Ҳисоб палатасининг ўзида ишлаган. Хусусан, очиқ манбаларда у идоранинг бош инспектори сифатида тилга олинган. Шунингдек, у Ўзбекистоннинг Россиядаги элчихонаси биринчи котиби сифатида ҳам кўрсатилган.

Жамшид Жаҳонгирович Мирзаев Ҳисоб палатаси раисининг яна бир ўринбосари этиб тайинланди. Эълон қилинган вақтда унинг аввалги иш жойи ва меҳнат фаолияти ҳақида очиқ расмий манбаларда батафсил маълумотлар мавжуд эмас.

Бир вақтнинг ўзида Отабек Валижонович Аллаберганов бошқа ишга ўтиши муносабати билан Ҳисоб палатаси раиси ўринбосари лавозимидан озод этилди. У ушбу лавозимни 2024 йил сентябридан бери эгаллаб келаётган эди.

Отабек Аллаберганов 1977 йилда Урганч шаҳрида туғилган. 1999 йилда Урганч давлат университетини тамомлаган, иқтисодиёт бўйича фалсафа доктори (PhD) илмий даражасига эга. Фаолиятини Хоразм вилояти солиқ органларида бошлаган, кейинчалик Солиқ қўмитасида ишлаган.

Сардор Мирзаев.

Ҳисоб палатаси раисининг яна бир ўринбосари — Сардор Алишерович Мирзаев — Президент администрациясига ишга ўтди. У Президент администрацияси Комплаенс хизматининг сектор мудири этиб тайинланди.

Сардор Мирзаев 1985 йилда Фарғона вилоятида туғилган. 2005 йилда Тошкент молия институтини тамомлаган. Турли йилларда Фарғона вилояти молия органларида, Молия вазирлиги ва Ҳисоб палатасида ишлаган.

2022−2023 йилларда у «Ўзбекнефтгаз» бошқаруви раисининг иқтисод ва молия бўйича ўринбосари лавозимида ишлаган. Шундоқ сўнг Ҳисоб палатасига қайтиб, ижтимоий соҳа харажатлари ва аҳолини ижтимоий қўллаб-қувватлашни аудит қилиш бўлинмасига раҳбарлик қилган. 2024 йил сентябрида Ҳисоб палатаси раиси ўринбосари этиб тайинланган эди.

Шанба куни президент Алишер Самадовни Ҳисоб палатаси раиси этиб тайинлаган эди. Унинг Президент администрациясидаги аввалги йўналиши Тимур Бутунбоевга ўтди, у ПА раҳбарининг сув ислоҳотлари бўйича ўринбосари — Ҳуқуқий экспертиза департаменти бошлиғи бўлди.