Тошкент ва пойтахт атрофидаги ҳудудлардаги иссиқхоналар 1 декабргача энергия тежамкор иситиш тизимига ўтиши керак
Тошкент шаҳри ва пойтахт вилоятининг бешта туманидаги иссиқхона хўжаликлари 2026 йил 1 декабрга қадар иситиш тизимларини ўзгартириши лозим. Бу талаб Вазирлар Маҳкамасининг 586-сон қарорида белгиланган. Янги чоралар ҳаво сифатини яхшилаш ва аҳоли саломатлигини муҳофаза қилишга қаратилган.
Экологик режим Тошкент шаҳри, Юқоричирчиқ, Қибрай, Янгийўл, Зангиота ва Тошкент туманларини қамраб олади.
Иссиқхоналарда табиий ва суюлтирилган газ, электр энергияси, геотермал ва қуёш энергиясидан фойдаланишга рухсат берилади. Шунингдек, иссиқлик электр станцияларининг иккиламчи иссиқлигидан ҳам фойдаланиш мумкин. Бунинг учун хўжаликлар давлат экологик экспертизасининг ижобий хулосасини олиши керак.
Кўмир, брикет ва пеллетдан фойдаланаётган иссиқхона эгалари 2026 йил 1 декабрга қадар рухсат этилган энергия манбаларига ўтиши шарт.
Қаттиқ ёқилғидан фойдаланишни давом эттирадиган хўжаликлар учун ҳам талаблар белгиланган. Улар ёқилғи узатиш ва ёниш жараёнини автоматик бошқариш тизимларини, шунингдек, чиқинди газларни тозалаш ускуналарини ўрнатиши лозим.
Бундан ташқари, иссиқхоналар чиқарилаётган зарарли моддалар миқдорини узлуксиз ўлчаб, маълумотларни Экология қўмитасига узатиб бориши керак. Хўжаликларда мувофиқлик сертификатлари, онлайн камералар ва захира электр генераторлари ҳам бўлиши шарт.
Шунингдек, улар узлуксиз электр таъминотини ва чиқиндиларни утилизация қилишни таъминлаши лозим.