Ўзбекистон 10 та Airbus H-145 тиббий вертолётларини харид қилишни режалаштирмоқда

Мамлакат Европа стандартларига жавоб берадиган авиация тиббий хизматини ташкил этиш ниятида.

Соғлиқни сақлаш вазири Амрилло Иноятов Самарқандда Франциянинг Airbus Helicopters компанияси раҳбарияти билан учрашув ўтказди. Бу ҳақда вазирлик Матбуот хизмати хабар бермоқда.

Учрашувда Ўзбекистон шошилинч тиббий ёрдам тизими учун 10 та Airbus H — 145 тиббий вертолётларини харид қилиш, шунингдек, мамлакатда Европа стандартларига жавоб берадиган тиббий авиацияни ташкил этиш истиқболлари муҳокама қилинди.

Бундан ташқари, моддий-техник базани яратиш ва бу соҳада мутахассислар тайёрлаш, тоғли ва бориш қийин бўлган ҳудудларда тиббий авиация хизматини ташкил этиш механизмларини ишлаб чиқиш режалаштирилган.