Tata Steel Chess 2024. Нодирбек Абдусатторов 4-турда пешқадам билан дуранг ўйнади

Нидерландиянинг Вейк ан-Зее шаҳрида шахмат бўйича Tata Steel Chess 2024 турнирида бугун 4-тур баҳслари ўтказилмоқда.

Турнирнинг Мастерс гуруҳида иштирок этаётган ўзбекистонлик гроссмейстер Нодирбек Абдусатторов 4-турда франциялик Алиризо Фиружага қарши қора донада ўйнади.

Ўйин нисбатан сокин ўтди. Томонлар катта таваккалчиликка боришмади ва 33-юришдан сўнг дурангга имзо чекишди.

Абдусатторов мазкур дурангдан кейин ўз очколарини 2,5 тага етказди. Ҳамюртимиз 5-турда хитойлик Ве Йига қарши оқ доналарда ўйнайди. Бешинчи тур ўйинлар 18 январь куни бўлиб ўтади.

Манба: stadion.uz