Нодирбек Абдусатторов онлайн шахмат рейтингида 4-ўринга кўтарилди

«Prague Chess Festival» турнирида иштирок этаётган Нодирбек Абдусатторов ФИДЕнинг онлайн рейтингида 5-ўринга кўтарилиб олгани ҳақида хабар бериб ўтгандик.

Ҳамюртимиз мусобақанинг 6-турида ҳиндистонлик Рамешбабу Прагнанандҳага ютқазиб қўйганидан кейин мазкур рейтингда 8-ўринга тушиб кетганди. Бироқ Нодирбек 7-турда Винсент Кеймерни мағлуб этиб, яна 5-поғонага қайтган бўлса, кеча Парҳам Мақсудлу (Эрон) устидан қозонилган ғалабадан сўнг ватандошимиз 4-ўринга чиқиб олди.

Абдусатторовнинг рейтингдаги очколари 2765,5 баллга етди. У амалдаги шахматтожи соҳиби Динг Лиженни ортда қолдирди. Учинчи ўринда бораётган Хикару Накамура ҳисобида 2789,0 балл мавжуд. Магнус Карлсен ва Фабиано Каруано 2800дан кўпроқ очко эга (2830 ва 2804).

Манба: stadion.uz