Ўзбекистон Венгрия билан ижтимоий ҳимоя, солиқ ва ҳудудларни ривожлантириш соҳаларида қонун ижодкорлиги бўйича тажриба алмашади

Ўзбекистон президенти Шавкат Мирзиёев Будапештга расмий ташрифи доирасида Венгрия Миллий мажлиси спикери Ласло Кёвер билан учрашди, деб хабар қилди давлат раҳбари матбуот хизмати.

Ўзбекистон-Венгрия стратегик шериклик муносабатларини, жумладан, парламентлар орқали ривожлантириш масалалари кўриб чиқилди.

Томонлар имзоланган битимларни амалга оширишга кўмаклашиш, дўстлик гуруҳлари ишини фаоллаштириш, энг аввало, ҳудудларни ривожлантириш, ижтимоий ҳимоя, солиқ ва рақамлаштириш соҳаларида қонун ижодкорлиги бўйича тажриба алмашиш учун тегишли қўмиталар ўртасида алоқаларни йўлга қўйиш муҳимлигига алоҳида эътибор қаратди.

Икки мамлакат парламент делегациялари ўртасидаги ўзаро ташрифлар ва учрашувлар фаоллашгани қайд этилди. Апрель ойида Миллий мажлис вице-спикери Янош Латорцаи Тошкентда бўлиб ўтган Парламентлараро иттифоқнинг 150-юбилей ассамблеясида иштирок этганди.

Йил охирига қадар Венгрия парламенти спикери ўринбосари ва Иқтисодиёт қўмитаси раҳбари Ўзбекистонга, шунингдек, Ўзбекистон парламенти делегацияси Будапештга ташриф буюради.